×

పవిత్తర్ బైబిల్ 2025

2 కొరంతివాళూన 8

1
హమార్ భాయియో, మాసిదోనియా మల్కేమా ఛజకో సంఘేవున దీనోజకో దేవేర్ కృపార్వడీ తమేన మాలమ్ కర్దేరోంచుఁ.
2
కూఁకతో, ఉందేన పర్చేర్నాఁయిఁ ఆయిజకో ఘణ్ భావేటిమాసదా, ఘణ్ ఆనందేతి ర. ఉజ్జీ ఓ ఘణ్ గరీబ్ వేన్ రతోయి సదా భర్పూర్ దలేతి దేర్వడీ ఆంగ బడ్తే ర.
3
ఏ కృపార్వడీ, పవిత్తర్ జనూర్ సేవామా భాగ్ లేర్వడీ, భర్పూర్ దలేతి హమేన నోరా కర్తే, ఓ దేసక జత్రాజ్ కోని పణ్, దేసక జేతి జాదా సదా ఉందేర్ ఖాతరేతి ఓజ్ దీనేకన్ తమేన గవాయి దేరోంచుఁ.
4
5
అత్రాజ్ కోని, ఓ అగ్డీ ప్రభూనన్, దేవేర్ చలావ్ణీన పక్డన్ హమేన, ఉందేర్ ఓజ్ హవాల కర్లీదే. అత్రా కరచ కన్ హమ్ కేల్దేకోని.
6
జేతి ఏ కామేన తీతు అగ్డీ కూఁ సరూ కీదోచకో, హన్నూజ్ ఓ కామేన తమార్మా భర్పూర్ కర్ణో కన్ హమ్ ఓన నోరా కీదే.
7
తమ్ హర్యేక్ కామేమా, కతో, విశ్వాసేమా, ఉపదేశేమా, జ్ఞానేమా, సొగ్ళీ వడీ జతనేతి రేర్ వడీ, తమేన హమార్పర ఛజకో ప్రేమార్వడీ కూఁ బడ్తే జారేచోకో, హన్నూజ్ తమ్ ఏ కృపామా సదా బడ్తే జావోజూఁ దేక్లో.
8
హకమ్ దజూఁ మ తమేన కేరోకొని పణ్, దూసర్ కూఁ జతనేతి చాల్రేచకో, దకాళ్ తాణి, తమార్ ప్రేమా కత్రా ఖరో ఛకో, పర్చో కర్ణో కన్ కేరోంచుఁ.
9
తమ్ అప్ణో ప్రభూ ఛజకో యేసుక్రీస్తూర్ కృపాన మాలమ్ కర్లీదేచో కోనిక? ఊ ధన్వాన్ వేన్ రతోయిసదా, తమ్ ఓర్ గరీబ్ పణేర్ కార్ణే ధన్వాన్ వేణో కన్, తమార్వాసు గరీబ్ వేగో.
10
ఏ వాతేర్వడీ మార్ సోంచ్ కేరోంచుఁ. తమ్ గోజే వర్సేర్ ఆంగ కరేనజ్ కోని పణ్, కరేన సరూ కరేర్వడీ సదా ఆంగవేన్ రేవోతో తమేన ఆచ్చో వేతో.
11
జేతి కర్ణో కేలేన్ తయ్యార్ ఛజకో మన్ తమార్మా కూఁ ఆయోకో, హన్నూజ్ తమేన ఛజేన పక్డన్ దేణో కన్ కజకో భర్పూర్ వజూఁ తమ్ ఓకామేన అబ పూరో కరో.
12
అగ్డీ దేణోకన్ తయ్యార్ ఛజకో మన్ తమేన రతో, దేసకజేతి జాదా కోని పణ్, తమేన ఛజేమాఁయిఁతీ తమ్ కాఁయిఁ దోచోకో, ఊజ్ తమేన ఆచ్చో.
13
దూస్రేన హోళీ రజూఁన్, తమేన భారి వేన్ రేణో కన్ ఈ వాత్ కేరోకొని పణ్, -జాదా గోళా కర్లీదో జేన జాదా బడోకోని కనన్, కమ్ గోళా కీదోజేన కమ్ హుయోకొని కన్ లకన్ ఛజూఁ.
14
15
సేన బరోబ్బర్ రజూఁ, అబ్బెర్ ఘడీ తమేన భర్పూర్ ఛజే మాఁయిఁతి ఉందేన ఛేనిజనాన్, ఉజ్జేక్ వణా, ఉందేన భర్పూర్ ఛజే మాఁయిఁతి తమేన ఛేనిజనా ఏకెన ఏక్ మదత్ కరేవాళ్ వేన్ రేణో కన్ హన్ను కేరోంచుఁ.
16
తమార్వాడీ మన ఛజకో ఈ హాయేపళజ్, తీతూర్ దలేమా సదా రజూఁ కీదోజకో దేవేన ధన్యవాద్.
17
ఊ మ కోజకో జతనేరి వాతేన మన్లీదో పణ్ ఓనజ్ ఘణ్ ఆశా రజేర్ కార్ణే ఓర్ ఖాతరేతి ఊజ్ నిక్ళన్ తమార్ కన ఆరోచ.
18
ఆచ్ ఖబర్ ప్రచార్ కరేర్ కామేవాస సే సంఘేతీ మాన్ లేల్దోజకో హమార్ భాయీన ఓర్ సాత మేల్రేంచాఁ.
19
అత్రాజ్ కోని అప్ణో ప్రభూన మహిమా రేణో కనన్, హమార్ తయ్యార్ ఛజకో మనేన దకాళ్ణో కన్ ఏమదత్ కీదేజకో ధనేర్వడీ సేవా కరేవాళ్ చాఁ జకో హమార్ సాత్ ఊ భళన్ ఆవ్ణోకన్ సంఘేవాళ్ ఓన నియమ్ కీదే.
20
ఉజ్జీ హమ్ అత్రా ఘణో ధర్మేర్వడీ సేవాకరేవాళ్ వేన్ చాఁ జేతి ఓర్వడీతి కుణీ సదా హమార్పర నిందా న ఢోళ జూఁ హమ్, జతనేతి దేకన్ ఓన మేల్రెంచాఁ.
21
కసేనకతో, ప్రభూర్ నంజ్రేమాజ్ కోనిపణ్, మన్క్యాఁవుర్ నంజరేమా సదా కుణ్సొ సొమోర్ కో, ఓర్వడీతి జతనేతి సోంచ్ కర్రెంచాఁ.
22
జేతి హమార్ భాయిన సదా హమ్ ఉందేర్ సాత్ మేల్రెంచాఁ. కత్రాయికో వణా ఓన పర్చో కరన్, ఊ ఆసక్తీతి ఛకన్, అబ్బసదా తమార్వడీ ఓన ఛజకో ఘణో విశ్వాసర్ కార్ణే ఉజ్జీ జదా ఆసక్తీతి ఛకన్ మాలమ్ కర్లీదేంచాఁ.
23
తీతూకూణ్ కన్ కుణీ పూచతో, ఊ మార్ సాతీన్ తమార్ కార్ణే ఊ మార్ సోబతేమా కామ్ కరేవాళోకనన్. నవతో ఏభాయి కూణ్ కన్ పూచతో, ఓ సంఘేర్ సోజాన్, క్రీస్తూర్ మహిమా వేన్ ఛకన్ మ కేరోంచుఁ.
24
జేతి తమార్ ప్రేమ్, సాదాసీదా వేన్ ఛకన్, తమార్వడీ హమేన ఛజకో బడ్పణ్ ఠాల్ వేనికన్ ఉందేన సంఘేఁవుర్ సమ్నక్ దకాళో.
Lambadi Bible 2025
2025, The Bible Society of India
:
Save Notes