Me o Pablo ni sem bichaldo e manusendar ta ni sem ttodo lendar te cherau gaia buchi, isto o Jesukristo bichalda man, ta o Del o Dad kai cherda e Jesuse te ustel katar o meripe,
O Jesukristo diape kurbano cheres amaro bilachipe, te braduil amen katar o bilachipe kai si akana ande gava sueto bilacho, soke gia mangla amaro Del ta Dad.
Me chudisailem but tumendar soke durilen gia oma katar o Del kai ikkarda tumen ta sikada po volipe e Kristoia, a tumen akana pachaien ande aver viasta.
O chachipe si kai inai aver lachi viasta. So llalpe kote si kai aver llene ttoven aver mislura maskar tumende ta mangen te pparruven e lachi viasta e Jesukristoki.
A vareko te inllarela maskar tumende aver viasta kai inai sargo gaia kai amen ppendam tumenge, proketo te avel e Devletar, i te avava isto me o iek suecho katar o miloso.
Me ni rodau te avau drago e llenenge, me rodau te avau drago e Devleke. Ni rodau te achau lacho e manusenchar. ¡Te rodiema te achau lacho e manusenchar, ni avilema iek esluga e Kristoko!
Tumen asunden so cherava omanglal kana pachava sargo e judiura ta sar llava silnomaia te marau e llenen kai sea katar e kkanlliri e Devleke ta sar mangava te zatriu la.