मैं तुहां ते सिर्फ एह़ जाणना चांह़दा ऐ, क्या तुहां पवित्र आत्मा मूसा दिया व्यबस्था जो मन्नणे दिया बज़ाह ते, या सुसमाचार सुणने कने तिस पर बसुआस करणे दिया बज़ाह ते पाया?
क्या तुहां ऐदेय नासमझ हन कि तुहां अपणी मसीह ज़िन्दगी पवित्र आत्मा दे कम्मां दे जरिये जेह्ड़ी तुहां च ऐ सुरू कित्ती, क्या हुण तुहां इसा जो अपणे कम्मां दे जरिये खत्म करणा चांह़दे हन?
परमात्मा जेह्ड़ा तुहां जो पवित्र आत्मा दिंदा ऐ कने तुहां च सामर्थी दे कम्म करदा ऐ, सैह़ क्या मूसा दिया व्यबस्था जो मन्नणे ते या मसीह दे सुसमाचारे पर बसुआसे करणे दिया बज़ाह ते इआं करदा ऐ?
कने पवित्रशास्त्रे च बड़ी पैहल्ले ते ई एह़ लिख्या ऐ कि परमात्मा होरनी जातिआं दे लोकां जो बसुआसे नैं धर्मी बणांगा, इसतांई पवित्रशास्त्रे च परमात्मे एह़ सुसमाचार अब्राहमे जो पैहल्ले ते ई सणाई दित्ता कि “तेरे जरिये सारी जातिआं दे लोक आसीष पांगे।”
इसतांई जेह्ड़े परमात्मे पर बसुआस करदे हन, ठीक तिंआं ई जिंआं अब्राहमें तिस पर बसुआस कित्ता। परमात्मा तिन्हां सारे बसुआस करणे आल़ेआं जो आसीष दिंदा ऐ, ठीक तिंआं ई जिंआं तिन्हीं अब्राहमे जो दित्ती।
इसतांई जितणे लोक मूसा दिया व्यबस्था जो मन्नणे दे जरिये परमात्मे जो खुस करणे दी कोसस करदे हन, तिन्हां जो परमात्मा सज़ा दिंगा, क्जोकि पवित्रशास्त्रे च लिख्या ऐ, “जेह्ड़ा कोई व्यबस्था दी कताबा च लिखियां सारियां गल्लां जो लगातार नीं मनदा, तिसियो परमात्मा सज़ा दिंदा ऐ।”
अपर एह़ गल्ल सच्च ऐ कि मूसा दिया व्यबस्था जो मन्नणे दे जरिये परमात्मे दे सामणै कोई धर्मी नीं बणदा, “क्जोकि जेह्ड़ा माणु परमात्मे पर भरोसा रखदा ऐ, सैह़ अप्पु जो बसुआसे दे जरिये धर्मी बणांदा ऐ, कने सदा जिन्दा रैंह्गा।”
मसीह जेह्ड़ा सूल़िया पर मरने दिया बज़ाह ते अहां तांई श्रापित होएया, कने तिन्हीं अहां जो खरीदी करी मूसा दिया व्यबस्था दे श्राफे ते बचाया, क्जोकि पवित्रशास्त्रे च एह़ लिख्या ऐ, “जेह्ड़ा कोई सूल़िया पर टुंगी करी मारेया जांदा ऐ सैह़ श्रापित ऐ।”
एह़ इसतांई होएया कि अब्राहमे दी आसीष जिसा जो परमात्मैं तिसियो दैणे दा वादा कित्या था, यीशु मसीह च होरनी जातिआं तिकर पुज्जें, कने अहां यीशु मसीह पर बसुआस करणे दे जरिये तिसा पवित्र आत्मा जो हासल करन जिसा जो दैणे दा वादा तिन्हीं अहां नैं कित्या ऐ।
हे प्यारे साथी बसुआसियो, मैं तुहां लोकां जो रोजे दी ज़िन्दगिया दा उदारण देई नैं ग्लांदा ऐ। जाह़लू दो माणु अप्पु च समझौता करदे हन, तां ना कोई तिसियो टाल़दा ऐ कने ना तिस च कुच्छ बधांदा ऐ।
ठीक तिंआं ई परमात्मैं अपणे वादे अब्राहमे जो कने तिसदे वंशे जो दित्ते। पवित्रशास्त्र एह़ नीं ग्लांदा ऐ, कि “तेरे वंशा जो,” जिंआं मतेआं दे बारे च ग्लाया; अपर एह़ इक्की माणुये दे बारे च ग्लांदा ऐ, कि “तेरे वंशे जो,” कने सैह़ मसीह ऐ।
अपर मैं एह़ ग्लांदा ऐ, कि सैह़ वादा जेह्ड़ा परमात्मैं अब्राहमे सौगी पैहल्ले ते ई पक्का कित्या था, तिसियो व्यबस्था चार सौ तीई साल बाद भी आई नैं नीं टाल़ी सकदी कि वादे बेकार होन।
क्जोकि परमात्मैं अहां जो आसीष मूसा दिया व्यबस्था जो मन्नणे दिया बज़ाह ते नीं दित्ती, अपर तिन्हीं अब्राहमे जो एह़ मुफ्ते च दित्ती, क्जोकि परमात्मैं तिस नैं दैणे दा वादा कित्या था।
तां भिरी मूसा दी व्यबस्था क्जो दित्ती गेई? व्यबस्था इसतांई दित्ती, कि लोक एह़ समझी लैन कि पाप सच्च-बिच्च क्या ऐ, अपर परमात्मैं व्यबस्था इसतांई बणाई तांजे एह़ मसीह दे ओणे दे बग्ते तिकर बणी रैंह्, जेह्ड़ा अब्राहमे दे वंशे दा ऐ, कने जिसदे बारे च वादा कित्या था। परमात्मैं व्यबस्था मूसा जो सुअर्गदूतां दे जरिये दित्ती जेह्ड़ा परमात्मे कने लोकां दा बचौलिया था।
तां क्या इसदा मतलब एह़ ऐ कि व्यबस्था परमात्मे दे वादेयां दे खलाफ ऐ? नीं बिलकुल नीं। क्जोकि जे ऐदई व्यबस्था दित्ती जांदी जेह्ड़ी ज़िन्दगी देई सकदी, तां व्यबस्था जो मन्नणे दे जरिये सदा दी ज़िन्दगी हासल कित्ती जाई सकदी थी।
अपर यीशु मसीह दे ओणे कने तिस पर बसुआस करणे ते पैहल्लैं अहां यहूदी लोक जेला च बंद थे कने व्यबस्था अहां दी रखवाल़ी करदी थी, व्यबस्था अहां जो ताह़लू तिकर कैदियां साइआं बणाई रखेया जाह़लू तिकर परमात्मैं अहां पर मसीह जो प्रगट नीं कित्ता।
इसतांई व्यबस्था मसीह दे ओणे तिकर अहां जो रस्ता दस्सणे तांई कने अहां दी रखवाल़ी करणे तांई दित्ती गेई, तांजे अहां परमात्मे दे सामणै मसीह च बसुआस करणे दे जरिये धर्मी बणन।
मसीह च हुण यहूदी कने यूनानी लोकां च कोई फर्क नीं; कने ना कोई दास च ना कोई अजाद च; ना कोई मर्दे च ना कोई जणासा च, क्जोकि तुहां सारे यीशु मसीह च इक्क हन।
क्जोकि जे तुहां मसीह दे हन, तां तुहां हुण अब्राहमे दे परवारे दा हिस्सा हन, कने तुहां जो सैह़ हर इक्क चीज्ज मिलगी, जिसदा परमात्मैं अब्राहमे सौगी वादा कित्या था।