Ījile gīko kūlwa gīkī, ū mulī Yesu Kilisito na a banhū ba mahanga bajanukūle ī lubango ja ng'wa Abulahamu, tūkwanukūle mu kūzunya ū kwisagījiwa kwa ng'wa Moyo.
Ū mhayo ūyo nalīgūhaya gūlī gīkī, ī lilagane līkatonga ū kūtūūlwa nū Mulungu, hūna lūūlū ī shilagīlo īsho shikandya kūtūmama ha numa ya myaka magana ane na makūmi adatū, shitīko kūgūkenaagūla nūūlū kūgwīnja ho ū kwisagījiwa.
Ī gīsī lūūlū ī shilagīlo shilī na nīmo kī? Ī shoi shikatūūlwa kūlwa nguno ya būhūbi, kūshisha ize ū Myalwa ūyo walī wamala kwisagījiwa. Shikalagīlwa mu nzīla ya bamalaika, shūshikīlījiwa mu nkono gwa nsangīja.
Ī gīsī numho lūūlū hū kūhaya ī shilagīlo shiipūganije nū kwisagīja kwa ng'wa Mulungu? Ūtūjaga gīko na hado yaya! Nguno ūlū ni shitūūlilwe ho shilagīlo īsho shidūgije kūtwinha būpanga, ū mhayo gwa kūbalīlwa būtūngīlīja mu nzīla ya shilagīlo ni gūlīho.
Gwike ī shandīkwa shihayile gīkī, pye a banhū balī ha sīlīlī ya shibi. Ū mu gīko ū kwisagījiwa ūko kūlīho kūlwa kūnzunya Yesu Kilisito, bakwinhagwa bazunya.
Būtīho būsolanhyiwa a ha gatī ya Nyudaya nū w'ihanga līngī, na a ha gatī ya nsese nū yūyo alī mu wiyabī, nūūlū a ha gatī ya ngosha na nkīma; nguno ū mulī Kilisito Yesu pye a bose mulī būmò.