अपर जाह़लू ठीक बग्त आया जिसदी योजना परमात्मैं बणाईयो थी, तां परमात्मैं अपणा इकलौता पुत्तर घल्लेया, जिन्हीं माणुये दे रूपे च जन्म लेआ, कने सैह़ इक्क यहूदी परवारे च पैदा होएया कने तिन्हीं मूसा दिया व्यबस्था दा पालण कित्ता,
कने जे अहां तिसदे बच्चे हन, तां परमात्मैं अपणे पुत्तरे दिया आत्मा जो, जेह्ड़ी परमात्मे जो “हे अब्बा, हे पिता ग्लाई करी हक्कां पांदी ऐ,” अहां दे मनां च घल्लियो ऐ।
हे प्यारे साथी बसुआसियो, मैं तुहां नैं विणती करदा ऐ, कि तुहां अपणे आप्पे जो व्यबस्था ते अजाद करी लेआ, जिंआं मैं होएया। क्जोकि मैं व्यबस्था ते अजाद होएया, जिंआं तुहां होरनी जातिआं आल़े होये, तुहां पैहल्ले तां मिन्जो तांई बड़े भरी खरे थे।
हलांकि मैं बमार था, कने मेरिया बमारिया दिया बज़ाह ते तुहां बड़िया परेसानिया थे, भिरी भी तुहां मिन्जो नैं नफरत नीं कित्ती। अपर तुहां मेरा आदर कने खरे कित्ते देखभाल कित्ती, ठीक तिंआं ई जिंआं कि मन्ना तुहां परमात्मे दे सुअर्गदूते दा या प्रभु यीशु मसीह दा आदर कित्ता।
सैह़ लोक जेह्ड़े यहूदी व्यबस्था पर जोर दिंदे हन, तुहां जो अपणे हक्के च लेयोणे तांई बड़े भरी उतावल़े हन, अपर खरे मकसदे ते नीं। तिन्हां दा मकसद तुहां जो मिन्जो ते लग्ग करणा ऐ, तांजे तुहां तिन्हां दे चेले बणी जान।
तुहां जेह्ड़े मूसा दिया व्यबस्था दे अधीन होणा चांह़दे हन, सिर्फ मेरियां गल्लां सुणा, मैं तुहां जो सैह़ दस्सगा, जेह्ड़ा मूसा दी व्यबस्था दिया कताबा च लिख्या ऐ।
पवित्रशास्त्रे च एह़ लिख्या ऐ कि अब्राहमे दे दो जागत होये। इक्क जागत हाजिरा ते होएया, जेह्ड़ी दासी थी, कने दूआ जागत सारा ते होएया, जेह्ड़ी तिसदी लाड़ी थी।
अपर तुहां हुण तिन्हां दे जरिये सताये जा दे हन, जेह्ड़े चांह़दे हन कि तुहां व्यबस्था जो मनन, ठीक इशमाएले साइआं सैह़ जागत जेह्ड़ा सरीरे दिया इच्छा मताबक पैदा होएया था, कने जेह्ड़ा इसहाके जो सतांदा था।