Nemouikayaj ken on oksekimej tlakamej yejuan nemij ipan in tlaltikpaktli. Nenkitlakamatiyaj on xkuajli espíritu itoka diablo* yejuan kinmandaroua ikan ipoder on xkuajkualtin espíritus ne tlakpak ipan ajakatl. Yejua no aman tekiti ipan inyojlo on yejuan xkitlakamatij Dios.
Cristo otechyoltlaliko ijkuak otechtlalij san sekan on hebreos* inuan on yejuan xhebreos*. Okipopoloj on tlauejli yejuan katka ken sen tepantli yejuan techxelojtikatka.
Ipampa imikilis, okipopoloj on ley iuan itlanauatiluan para okinsentlalij san sekan on hebreos* niman on yejuan xhebreos*. Ijkon onochiu yolseuilistli intech yejuamej.
Itechkopa imikilis Cristo ipan on kojnepanojli, okipopoloj on tlauejli yejuan on hebreos* niman on xhebreos* okipixkej, niman san sekan onokuepkej itech Dios.
Nemejuamej nemochiuaj itiopan Dios yejuan ken sen kajli yejuan onkaj ipan sen cimiento*. On cimiento sano yejua on temachtijli yejuan on apóstoles* niman on tiotlajtojkej okitlalijkej. Niman iesquineroj on cimiento* sano yejua Cristo Jesús.
Niman ijkon, nemejuamej san sekan iuan Cristo nemosentlaliaj iuan nochimej on oksekimej yejuan tlaneltokaj para nemochiuaj sen kajli kampa Dios nemi ikan iEspíritu Santo.