|
| 1 |
|
| Ki'ne sao'nenninna cubbi'nenni kainohunni alba reyitinoonnireeti. |
|
| 2 |
|
| Hakka waro tenne gobba bunshe ha'runsitinanni heedhinoonni. Iima bubbete aana heedhanno durriissara roorricha ikkinohura hajajantinanni heedhinoonni. Hakku ayyaani xa Maganoho hajajantannokkire gashshanno. |
|
| 3 |
|
| Ninke baalunku hakko manni gede halchonkenna hedonke garinni maalu yorto wonshinanni hee'noommo. Wolu manni gede kalaqaminkenni Maganu hanqi giddo hee'noommo. |
|
| 4 |
|
| Ikkollana maarote dureessa ikkinohu Maganu lowo geeshsha baxannonke daafira, |
|
| 5 |
|
| saonkenni kainohunni reyine hee'neenna, Kiristoosi ledo heeshsho uyinonke. Ki'neno gattinoonnihu eltosinniiti. |
|
| 6 |
|
| Maganu Kiristoosi Yesuusi ledo reyotenni kayise gordu gobbara isi ledo worinonke. |
|
| 7 |
|
| Hatto assinohuno, dagganno yanna baalate Kiristoosi Yesuusi widoonni qole xawisinonke shaqqillinni uyinonketa dannu nookki eltosi leellishankera yeeti. |
|
| 8 |
|
| Ki'ne gattinoonnihuno amma'nate widoonni eltosinniiti. Kunino Maganu mulla uyino'ne ba'raa'raati ikkinnina, ki'nenni di"ikkino. |
|
| 9 |
|
| Loosunni afi'nannita di"ikkitinona, ayino naaxxoonke. |
|
| 10 |
|
| Maganu Kiristoosi Yesuusi widoonni qole xa hee'noommo gedeere asse kalaqinonkehu, balaxe qixxeessinoha dancha looso loonseemmo gedeeti. |
|
| 11 |
|
| Ki'ne ilama'nenni alba daga ikkitine heedhinoonniri, Ayihude mannu anga barcimansanni naaxxitanni ki'ne, «Barcimtinoonnikkiri» yitanno'neta qaagge! |
|
| 12 |
|
| Hatte yannara Kiristoosire affinikkinni, Israeelete qansichimma hooggine, hexxote gondoorirano wosi'nitine hexxo nookki gobbara Maganono afidhinikkinni heedhinoonnita qaagge. |
|
| 13 |
|
| Ki'ne bashsho faffine heedhinoonni. Xa kayinni Kiristoosa Yesuusa amma'nitine mundeesinni gamba yitinoonni. |
|
| 14 |
|
| Badinonkeha gibbote gammala maalisinni diige, Ayihudenna Daga mitto assinohu Kiristoosi keerenkeeti. |
|
| 15 |
|
| Lamenta gosa xaadise umisinni mitto haaro manna assara, Ayihudete Seeranna wogansa moofise keere kalaqino. |
|
| 16 |
|
| Masiqalu aana reyasinni diinooma hunino. Kunni masiqalinni lamenka mitto biso asse Maganu ledo araarsino. |
|
| 17 |
|
| Daye kae, ki'ne faffine heedhinoonniriranna gamba yite noorira keerunniha Dancha Duduwo kulino'ne. |
|
| 18 |
|
| Isi loosinni ninke baalunku mittu Qullaawu Ayyaani widoonni hinge Annunniwa ea dandiinoommo. |
|
| 19 |
|
| Ki'ne Dagano Maganu manni ledo gobbate ayiddeetinna Maganu fiixaati ikkinnina, wosinanna manni gobba manna di"ikkitinoonni. |
|
| 20 |
|
| Soqqamaasinetenna himanaanote safo aana xintantinoonni. Qaru dhaawate kinchi Kiristoosa Yesuusaati. |
|
| 21 |
|
| Minu gudisame isinni xaade Mootichaho Qullaawa Mine ikkate lophanno. |
|
| 22 |
|
| Ki'neno Maganu Ayyaanunni galanno mine ikkate isinni minantinanni. |
|
|
|
|