×

పవిత్తర్ బైబిల్ 2025

ఎఫెసీవాళూన 4

1
జేతి, తమ్ సమాధానేర్ బంధనేతీ ఆత్మా దజకో ఐక్యతాన రక్వాళీ కర్లేర్వడీ ధ్యాన్ దేవాళ్ వేన్, ప్రేమేతి ఏకన ఏక్ ఖమ్తే,
2
3
తమేన బలాయోజకో బలావ్ణీన ఛాజజూఁ ధీరేతీన్ శాంతీతీన్, భర్పూర్ నావణేతి చాల్ణో కన్, ప్రభూర్ కార్ణే ఖైది వేన్ ఛూంజకో మ తమేన నోరా కర్రోచుఁ.
4
జీవ్డా ఎక్కజన్, ఆత్మా సదా ఎక్లోజ్; ఓజ్ తరీకాతీ తమార్ బలావ్ణీర్ వడీతీ, ఏక్కజ్ నిరీక్షణేతి రేణోకన్ బలాన్ ఛో;
5
ప్రభూ ఎక్క జ్, విశ్వాస్ ఎక్క జన్, బాప్తీసమ్ సదా ఎక్కజ్,
6
సేరో బాప్ ఛజకో దేవ్ ఎక్లోజ్. ఊ దేవ్ సేర్ ఊంపర్ రేన్, సేమా ఫ్యాలన్, సేమా ఛ
7
తో అపణేమా హర్యేకేన క్రీస్తూ దినోజకో వరమేన పక్డన్ కృపాన దీనోచ.
8
జేతీ, ఊ ఊంపర్ గోజనా, బంధణేన బంధీర్ నాఁయిఁ పకడ్లెజాన్ మన్క్యా వూన భేంటేవూన దీనోకన దేవేర్ పవిత్తర్ గ్రంధేమా కేమేలన్ ఛ.
9
ఊంచ గో కతొ ధర్తీర్ హేటేర్ భాగేమా సదా ఉత్రో కన్ మాలమ్ వేరీచ కొనీక?
10
ఉత్రోజకో ఊజ్, సొగ్ళీన ఓర్ ఆత్మాతీ భరేన అస్మానేతీ ఊంచ చడోచ.
11
అపణ్ సే విశ్వాసేమాన్ దేవేర్ బేటార్ వడీర్ జ్ఞానేమా సదా ఏక్తా పాన్ కతో క్రీస్తూన ఛజకో భర్పూరేతీ బరోబర్ భర్పూర్ ఛజకో వేన్ రజేలగూ, ఊ హన్ను నియమ్ కిదో.
12
13
పవిత్తర్ జన్ భర్పూర్ వజూఁ క్రీస్తుర్ జీవ్డామా ఖోసళ్ పాయేనన్, సేవార్ ధరమ్ వజూఁ, ఊ థోడ్సేకేన అపొస్తలేవూర్నాఁయిఁన్ థోడ్సేకేన ప్రవక్తాఁవూఁర్నాఁయిఁ, థోడ్సేకేన ఆచ్ ఖబర్ ప్రచార్ కరేవాళేఁవూఁర్నాఁయిఁన్, ఉజ్జీ థోడ్సేక్ సంఘేన ఖోసళేతి చలాయెవాళేర్నాఁయిఁ, సికాయేవాళేవూన నియమ్ కిదో.
14
జేతీ అపణ్ అబ్బేతీ నాన్క్యా బాళావూర్నైఁరేన్, ఢోకో దేవాళ్ చాలాక్ ఆద్మీర్ మాయాతీ, గలత్ వాటేమా ఖీంచజకో చాలాకీతీన్, వాళేతి వడ్ జావజూఁ, భేళ్ భాళ్ ఛజకో హర్యేక్ ఉపదేశేర్వడీ ఒవ్డీ యేవ్డీ పాల్డే జావజూఁ, హలోళేమా వ్యారాజాజూఁ, నరజూఁ
15
ప్రేమేతీరేన్ సతేరి వాతే కేతే, క్రీస్తూర్ నైఁ రేన, అపణ్ సే వాతేమా వద్ తే రాఁ.
16
ఊజ్ సర్ వేన్ ఛ, ఓర్ మాఁయీఁతీ సారి జీవ్డా సొమోర్ జోడాన్, ఓర్మా ఛజకో హర్యేక్ జీవ్డార్ భాగ్ ఓర్ పరిమాణేన పక్డన్ కామ్ కర్తేరజనా, హర్యేక్ ఖీలేర్ జోరేతీ జోడాన్, ప్రేమేమా ఓన ఖోసళ్ వజూఁ, జీవ్డాన బడావ్తేరచ.
17
జేతీ ఆన్య జన్ చాలజుఁ తమ్ అబ్బేతీ చాలేర్ ఛేనికన్ మ ప్రభూమా గవాయి దేరోంచుఁ.
18
ఓతో అంధారేర్ మన్ ఛజకో వేన్, ఉందూర్ దల్లేర్ కఠీన్ పణేతీ, ఉందూర్మా ఛజకో అజ్ఞానేతీ దేవేర్వడీ వజకో జీవేమాఁయిఁతీ నాళీకర్మేలేజకోవేన్, ఉందూర్ మనేన ఆవజే, కామ్దేనిజేన పకడన్ చాలచ.
19
ఉందేన లాజ్ ఛేనిజూఁ రేన్, తరీకా తరీకార్ అపవిత్తర్ కామేన ఘణో ఆశాతి భర్పూర్ కరేన ఉందూర్ ఓజ్ కాముకతాన హవాలే కర్లీదే.
20
పణ్ తమ్ క్రీస్తూర్ బారేమా సామ్ళన్, ఓర్ మాఁయిర్ సతేన కూఁ ఛజూఁజ్, ఓర్ మాఁయి బోదా సామ్ళేవాళేర్నైఁ రేపణ్, తమ్ క్రీస్తూన హనూ సీక్లీదేజకొ కోని.
21
22
జేతి తమ్ పేనా బంచేజకొ బంచావ్ణీర్ వడీతీతో, ఢోకాబాజీతి భరోజకో దురాశార్ కార్ణే ఖరాప్ వజకో ప్యానార్ గోణేన ఛోడదేన్,
23
తమార్ మనేరో సొంచెమా నవ్వో వేగేజకో వేన్,
24
నియతన్ సాసోపణేర్ భక్తీ ఛజకో వేన్, దేవేర్ రూపేమా సృష్టీ వేన్ ఛజకో నవ్వో గోణ్ ప్యార్లేణో.
25
అపణ్ ఏకేన ఏక్ జీవ్డామా భాగ్ వేన్ ఛాఁ జేతీ, తమ్ లబారీకరేర్ ఛోడ్దేన్, హర్యేక్ ఆద్మీ ఓర్ బగలేవాళూతీ సాసజ్ వాతేకర్ణో.
26
రీస్ కరోపణ్ పాప్ కరో మత్; దాడో డూబ జేతాణీ తమార్ రీస్ రేణోకోని.
27
సైతానేన జాగ్ దోమత్. చోరీకరేవాళో అబ్బెతీ చోరీ నకరజుఁ, వేలామా ఛజేన మదత్ కరేన ఛాజజత్రా ఓర్ హాతేతీ అచ్చో కామ్ కరన్ కష్టా కర్ణో.
28
29
తమార్ వాతేన సామ్ళజేన భలాయి వజుఁ ఖోసళేర్ వాతేన్, జరూర్ ఛజకో వాతేజ్ కరో పణ్ భాండ్-గాళీరి వాతే కుణ్సీ సదా తమార్ మూండేమా ఆయేదో మత్.
30
దేవేర్ పవిత్తర్ ఆత్మాన దుఃఖ్ పాయేదో మత్; విమోచనేర్ దాడేలగు ఓ ఆత్మామా తమ్ ముద్రా ఛపాన్ ఛో.
31
హరియేక్ ద్వేష్, రీస్, క్రోద్, భాండ్-గాళీ దేరో, సొగ్ళీ దుష్టతాన తమ్ ఛోడ్దో
32
ఓర్ బదల ఏకీతీ ఏక్ దయాతీన్ మేరేతి రో. దేవ్ తమేన క్రీస్తూమా మాఫ్ కీదోజూంజ్ తమ్ సదా ఏకీన ఏక్ మాఫ్ కరో.
Lambadi Bible 2025
2025, The Bible Society of India
:
Save Notes