Min nbɑ be dɑnsɑlk tuonɑ nbɑ k n tuun k tien Yonmdɑɑnɔ pɑɑk, n bɑln’mi e ɑ i ŋɑɑn k i binbenŋ i tie fɑnu nɑn Yennu nbɑ din luon k lii tie biɑnŋ nbɑ nɑ yuo nbɑ k u din yiin’i nɑ.
Ŋuɑ e tul nisɑɑli piini, k gɑnn nisiɑb k tien’m tuomiinbɑ, k lieb mun tie sɔkniinbɑ, k yenm mun biɑ tien lɑbɑmɑnn muɑnt-tieb, k siɑb mun lek tie Klistu pɑstɑɑnbɑ nɑn wɑntieb.
nɑn yuo nbɑ k t sɑɑ tɑɑn tien yonm t yɑdɑ ni nɑn tɑɑ bɑnn Yennu Bijɑ biɑnŋ nbɑ, k t sɑɑ nyik t bisn k tien nikpelɑ, k gɑɑl Klistu binbenŋ nbɑ tie dede.
Ŋɑɑn t ji kii tie wɑɑs kɑɑ, k niib kpinkpɑnni wɑnnu sii diɑ’t lɑnŋ’t nɑn wounŋ nbɑ tuu lɑnŋ bulgbetl biɑnŋ nbɑ nɑ, k b fɑɑk wɑnnu te k lieb bɑɑ biit ni.
Ŋuɑ e te k gbɑnɑnt bɔkɑ kul diɑ b lieb, k gbɑnɑnt mɑnŋ tuktɑ diɑ nɑn lieb. L kul ɑ i bo i tuun nɑn lieb cib cib, gbɑnɑnt mɑnŋ bo sii kpɑɑtl e nɑn lieb lonm ni.
L pɑɑk, yɑbt i mɔnŋ mɑn k nyik i binbenkpelk nbɑ din te k i tuun lin nbɑ k i din tuu tuun nɑ. Binbenkpelk mɑnŋ nɑn niɑnbiiuk din te k i tɔkn sɔnu nbɑ sɑɑ biil’i.
I dɑɑ te k mɔbonbiit nyi i mɔi ni, ŋɑɑn i te k i mɔbonɑ i mɔk nyuɑt, lin nbɑ sɑɑ sonm i lieb b yɑdɑ ni k sonm’b nɑn lin nbɑ siɑn, k biɑ ŋɑnm bin nbɑ gbiɑ i mɑɑn nɑ.