Nâmo, zibeipazy saih u, cha hawhna chata nâmo chhao nama seizy chô liata tao hra teh u. Âmo chhao, nâmo chhao, avâ liata zibeipa pakha nama hneipa pahnopa ta, ano liata cha khokhei eih viapa y veih ei tahpa pahnopa ta, nama seizy pachhipary khuh vy.
Eimâ piapazy he sapa nata thisaih châ leipa ei ta, abeinazy, biehneinazy, he khizaw zohna chô liata hmotaotheinazy nata avâ suzy liata a ypa thlahpa moleipazy tlao ama châ.
Chavâta noh pha leipa liata namâ dyuh thei nawpa nata nama tao khai tawh chhao ta namâ duah thei nawpa ta, Khazohpa chariah chhaichhi pakipa ta a tobi teh u.
Thlahchhâna nata hiana to ta khatino rai ta Thlahpa ta thlahchhâ teh u. Cha châna chata a hrohrua u la, mopathaihpa zydua châta bâh leipa ta thlahchhâ teh u.
Unawh kyhpachâpa nata Abeipa chakaotuhpa ngâchhihpa Tykiku ta hmo to cha chho aw ei ta, kheihta y na ta, khâpa ma ei tao hai tahpazy nama vaw pahno aw.