Musa ni daa tɔɣisi Izraɛlnim’ zaa yɛtɔɣ’ shɛŋa Jɔɔdɛn mɔɣili duli tiŋgban’ nɛli ni bɔpiɛligu din daa be Suf tooni, ka be Paran mini Tɔfɛl ni Leeban ni Hazɛrɔt ni Dizahab sunsuuni la m-bɔŋɔ.
Yuun’ shɛli din daa pahiri yuun’ pihinahi gol’ so ŋun pahiri piniyini dahin yini dali ka Musa daa yɛli Izraɛlnim’ kaman Yawɛ ni daa zal’ o ni o yɛli ba shɛm.
Yiɣisimiya n-lan gbaai chandi ti kpe Amɔrinim’ zoya ni mini tiŋgbɔn shɛŋa din baɣi ba ka nyɛ Araba zoya ni tinsi ni ni Shɛfɛla ni Nɛgɛb ni teeku noli ni Keenannim’ tiŋgbɔŋ ni ni Lɛbanɔn n-zaŋ hal ti paai mɔɣ’ titali din nyɛ Yufretiiz Mɔɣili la ni.
Nyamiya, tiŋgbɔŋ maa ka n zaŋ sɔŋ yi tooni maa, kpɛmiya di ni ti deei n ni daa po pɔri zaŋ tiŋgbɔn shɛli ti yi yaannim’ Ibrahimma mini Yisahaku ni Yaakubu ni bɛ zuliya la.”
Yawɛ ŋun nyɛ yi yaannim’ Naawuni ŋɔ ni chɛ ka yi galisim maa pahi ʒii tuhili zuɣu, ka o niŋ alibarika niŋ yi ni kaman o ni daa lɔn ya alikauli shɛm la.
Dinzuɣu ka n daa pii yi daŋ kam ni zuɣulaannima bɛn mali yɛm, ka mali yu’ suma n-zaŋ ba leei yi zuɣulaannima. Ka bɛ su niriba tuhilituhili mini niriba kɔbigakɔbiga ni niriba pihinunu ni niriba piapia fukumsi, ka nyɛ yi daŋ kam ni kpamba.
Di saha maa ka n daa yɛli yi sariakaritiba maa, “Wummiya yi niriba yɛtɔɣa viɛnyɛliŋga, ka karimiya yɛtɔɣa din be nir’ min’ o kpee sunsuuni zaŋ tabili saamba bɛn be yi sani saria ka di tuhi.
Miriya ka yi ti be yaɣ’ yini polo kɔŋko yi saria karibu ni. Wummiya tarimba mini wɔɣira yɛtɔɣa. Di zɔnya so dabiɛm, dama saria karibu maa nyɛla Naawuni dini. Ka yɛl’ shɛli saria karibu yi ti kpɛm nyaŋ ya, yin’ zaŋmiya li ka n sanna ka n ti di di saria maa.”
Di nyaaŋa ka ti daa yiɣisi Sinai n-chaŋ ti tim yi ni daa nya tiŋgban’ nɛli shɛli din galisi ka mali dabiɛm la ni zaa gari. Ka ti daa be soli chani Amɔrinim’ zoya ni tiŋgbɔŋ la ni hal ti paai Kadɛshibarinia kaman Yawɛ ŋun nyɛ ti Naawuni ŋɔ ni daa zali ti shɛm la.
Nyamiya, Yawɛ ŋun nyɛ yi Naawuni ŋɔ zaŋ tiŋgbɔŋ maa tin ya. Chamiya ti deei li su kaman Yawɛ ŋun nyɛ yi yaannim’ Naawuni ŋɔ ni daa lɔn ya alikauli shɛm la. Di zɔriya dabiɛm bee n-chɛ ka yi suhuri zɔhira.”
Ka yi zaa daa ka n sanna ti yɛli, “Chɛ ka ti tim niriba ka bɛ daŋ ti tooni chaŋ ti puɣisi kaai tiŋgbɔŋ maa ti ti, ka ʒi lahibali labina ti yɛli ti ti ni yɛn doli so’ shɛli chaŋ fɔntiŋ’ shɛŋa ni ti ni yɛn chaŋ.”
Ka bɛ daa zaŋ tiŋgbɔŋ maa ni tiwal’ shɛŋa na nti ti ti. Bɛ daa lan ʒi lahibali na ti yɛli, “Tiŋgbɔn viɛlli ka Yawɛ ŋun nyɛ ti Naawuni ŋɔ zaŋ ti ti maa.”
ka be yi tanti suɣa ni ŋumdi yi kparima ni yɛra, “Yawɛ ni je ti maa zuɣu ka o daa yihi ti Ijipti tiŋgbɔŋ ni na ni o ti zaŋ ti niŋ Amɔrinim’ ŋɔ nuu ni ka bɛ ku ti.
Ya polo ka ti lee chana? Ti mabihi maa ni labina ti yɛli shɛm maa chɛ ka ti suhuri fuŋ. Bɛ yɛliya, ‘Niriba maa mali yaa ka lan wɔɣiwɔɣ’ gari ti, ka bɛ fɔntinsi maa galisi, ka bɛ me goma gil’ li hal ti taɣi sagbana. Hal ti nyala Anakinim’ nimaani.’ ”
ŋun daa be yi tooni mali ya be soli chana ni o ti bo palo tin ya ka yi ti yi suɣa dɔni la yɛda. O daa bela buɣim ni yuŋ, ka be sagban’ ni wuntaŋ’ ni ni o wuhi ya yi ni yɛn doli so’ shɛli.”
“Ka di yi nyɛla yi bibihi shɛb’ yi ni yɛli ni bɛ ni ŋme ŋ-gbahi ba la, yi bi’ shɛb’ bɛn bi mi din viɛla ni din bie zuŋɔ dabisili ŋɔ n-ni ti kpe di ni, bɛna ka n ni ti zaŋ li ti ka bɛ deei li su.
“Ka yi daa garigi yɛli ma, ‘Ti tum alahichi Yawɛ sani. Ti ni chaŋ ti tuhi tɔbu maa kaman Yawɛ ŋun nyɛ ti Naawuni ŋɔ ni zali ti shɛm maa.’ Ka yi ni doo kam daa zaŋ o tɔbutuhiri’ nɛma niŋ omaŋa, ka daa tɛhi ni zoya ni tiŋ’ maa ni chandi yɛn nyɛla asama.