ka n ti sabi yɛtɔɣ’ shɛŋa din daa be tuuli kuɣ’ parilan’ shɛŋa a ni daa wurim la zuɣu m-pa kuɣ’ parilana ayi maa zuɣu, ka a zaŋ li niŋ adaka maa puuni.’
“Dinzuɣu ka n daa zaŋ gɔpiɛliga dari mali adaka ka kpe kuɣ’ parilana ayi kaman tuuli dina la n-zaŋ kuɣ’ parilana ayi maa gbibi n nuu ni du zoli maa zuɣu.
Ka o daa sabi yɛtɔɣ’ yinsi shɛŋa o ni daa tuui sab’ la pa kuɣ’ parilana maa zuɣu. Yɛtɔɣa maa n-nyɛ fukumsi zalikpana pia shɛli Yawɛ ni daa zaŋ yɛli ya buɣim sunsuuni yi laɣiŋgu dal’ la, ka Yawɛ daa zaŋ li ti ma.
Di nyaaŋa ka n daa ŋmaligi zoli maa zuɣu siɣina ti zaŋ kuɣ’ parilana maa niŋ n ni daa mali adaka shɛli maa puuni, ka di be di ni kaman Yawɛ ni daa zali ma shɛm maa.”
(Ka Izraɛlnim’ maa daa yiɣisi Bɛrɔtibɛnɛjaakan n-chaŋ Mɔsɛra. Nimaani ka Aduna daa kpi, ka bɛ daa sɔɣ’ o nimaani, ka o bidibiga Ɛliɛza daa leei maligumaana zan’ o zaani.
Di saha ka Yawɛ daa pii Lɛvi zuliya niriba zali ni bɛ ʒiri Yawɛ Daalikauli Adaka maa, ka zaan’ o tooni tumd’ o tuma, ka zaŋd’ o yuli niŋdi alibarika niŋdi niriba ni hal ni zuŋɔ dabisili ŋɔ.
“N daa be zoli maa zuɣu la wuntaŋ’ ni mini yuŋ biɛɣ’ pihinahi kaman n ni daa pun niŋ shɛm tuuli la. Ka Yawɛ daa lan deei n suhigu, ka daa bi lan lo ni o kun ya.
Ka Yawɛ daa yɛli ma, ‘Yiɣisima, garim’ niriba maa tooni leei bɛ zuɣulana ka yi lan gbaai soli, ka bɛ chaŋ ti ʒini n ni daa po pɔri bɛ yaannim’ sani ni n ni zaŋ tiŋgbɔn shɛli ti ba la ni.’
“Dinzuɣu Pumpɔŋɔ Izraɛlnima, bɔ ka Yawɛ ŋun nyɛ yi Naawuni ŋɔ lee bɔri yi sani? Lumiyala ŋun’ Yawɛ ŋun nyɛ yi Naawuni ŋɔ sizuura, ka dol’ o soya zaa ka yur’ o ka jɛmdi ŋun’ Yawɛ ŋun nyɛ yi Naawuni ŋɔ ni yi suhuri zaa ni yi shihi zaa,
Dama Yawɛ ŋun nyɛ yi Naawuni ŋɔ n-nyɛ wuna zaa Naawuni mini duumanim’ zaa Duuma. Ŋuna n-nyɛ Naawuni ŋun galisi ka mali kpiɔŋ ka o yɛla mali dabiɛm, ŋun’ bi gaŋdi so bee n-diri birapu.
Yi yaannim’ bɛn daa chaŋ ti ʒini Ijipti la daa nyɛla ninvuɣ’ pisopɔin, ka pumpɔŋɔ Yawɛ ŋun nyɛ yi Naawuni ŋɔ chɛ ka yi galisi kaman saŋmarisi bɛn be zuɣusaa ŋɔ.”