Ta o Del pisisarda pe table e des alava katar so si te cheren, isto gia sar cherdaia le o purvo ka na dia orba tumenchar po burdo maskar e iag, kana sa chidinailen. Mande dia len,
E israelitura lleletar katar o Beerot Bene Jaakan ta lleletar ando Mosera. Kote mulo o Aron, ta prajosarde le, ta pe leko than popoko achilo leko chaurro o Eleazar.
Ondaka ande gua vreme si kai o Del esvirisarda e vicha katar o Levi te inllarel e arka katar e alava e devleke te aven angla le te radin leke ta te blagosin ande leko anav llik allive.
Akana, israelita ¿so mangel o Del tumaro Gazda? Samo te den le liubao ta te llan pe sa leke droma, te volin le ta te blagosin le sa tumare liea ta sa tumare zivotoia,
A o Del mangla te ezbiril tumare puranen ta volisarda len ta mapalal esvirisarda lenge porodo, kai sen tumen maskar sa ogola forura sar tumen dikhen allive.
soke o Del tumaro Gazda si o Del e delengo ta o Gazda e gazdengo, o Del o baro ta zuralo, kai trubul te daran letar, kai sa e llene si leke sargo iek, ta ni bichindol.
O Del si chacho e llenenchar kai inai len dei ni dad ta e phlivlienchar ta kai volil e llenen kai aven katar aver phuvia kai zivin maskar tumende ta kai del len jape ta patave.