Kawuono paruru puonj mane uyudo kuom Ruoth Nyasaye ma Nyasachu, nimar, kata obedo ni nyithindu pok oneno kata pok ong’eyo puonjno, un to ung’eye. Bende paruru duong’ mar Ruoth Nyasaye gi tekone kod bade morie,
kod gima notimo ni Dathan kod Abiram, yawuot Eliab ma ja-Reuben, kendo kaka piny nong’amo dhoge momwonyogi kaachiel gi joodgi gi hembegi kod ji duto mane gin-go, mana ka jo-Israel duto neno.
Piny ma ubiro donjoe mondo udagieno ok chal gi piny Misri kuma ne uaye, nimar kuno kane usechwoyoe cham, to bang’e nusombo pi uole, mana kaka itimo ni puoth alot.
Kutimo kamano, to mirimb Ruoth Nyasaye noliel kuomu ka mach, mi enomi koth rum. Piny ok nochieg cham, kendo karu nolal nono piyopiyo e piny momew ma Ruoth Nyasaye nomiuno.
Kamano kamoro amora ma tiendu onyono nobed maru, kendo mbap pinyu nochakre e thim yo milambo nyaka piny Lebanon yo nyandwat, kendo chakre aora Yufrate yo wuok chieng’ nyaka nam Mediterania yo podho chieng’.