Lalpa chungchâng, nangmahni ngeiin in hriatte kha ngaihtuah ṭhîn rawh u. Chûng thil hretute chu in fate an ni lo, nangmahni ngei hi in ni, Lalpa in Pathian thununna natzia te, a ropuizia te, thu a neihzia te leh thil a tihtheihzia te in hmu a;
Aigupta sipaiho, an sakawrte leh an sakawrtawlailîr a sawisak dân te leh an ûm lai che ua Tuipui Sen a chîmpiltîr dân te, vawiin thlenga a tihchhiat tâk thu te in hre vek a ni.
Reubena thlah zînga Eliaba fa Dathana leh Abirama te chu an chhûng te, an puan in te, an chhiahhlawh te leh an ran te nên lam bûk dang kiang maia awm an ni na a, lei a lo kak a, an tlâk tâk bîkzia te kha in hria a,
Lalpa chu a thinur ang a, vânte khi khârin ruahte a sûrtîr lo vang a, leiah eng mah a rah lo mai ang. Lalpa pêk che u ram ṭha tak aṭang hian in boral thuai mai ang.
Chuvângin, a thute hi in rilru leh in thinlungah vawng ṭha ula, hlut hle rawh u, in hriat reng theih nân in bânah te phuar bet ula, in mit inkâr chalhrênah te dah rawh u.
“A thupêk ka hrilh zawng zawng che u hi zâwm ula, ti ṭhîn rawh u. Lalpa in Pathian chu hmangaih ula, a duh ang chuan awm ula, amah chu vuan tlat rawh u.
Vawiina ka hrilh che u Lalpa in Pathian thupêk awih duh lo te, tih tûr ka hrilh che u ti lova pêng bo te, in la hriat ngai hleih loh pathian dang biakte hi ânchhe dawnna kawng chu a ni.
“ Lalpa in Pathianin in luah tûr ram a hruai thlen hunah che u chuan Gerizim tlângah malsâwmna kawng hi puang ula, Ebal tlângah ânchhe dawnna kawng hi puang bawk ang che u.