Ong’em anyun iman oldinwek tugul, ole kioote kanamonikwak bororiosiek che oluule, che mi tulonok che koen, ak che mi legemosiek, ak che mi ketik che tuonen kel:
oib kagochinoikwok che kibeelei, ak tiseiywekwok, ak kebeberwekwok, ak kagochinetab eunekwok ne kinamjin barak, ak kaarortaosiekwok, ak kagochinoikab chamnyet, ak che twatei tukwok ak kechirekwok:
Ago ye kaolande eng’ Jordan, obe omeny emet ne konok Jehovah Kamuktaindeng’wong’ onyaban, ak kogonok kamuung’et eng’ bunikwok tugul, che mi komoswek tugul, si omeng’isiei eng’ kalyet;
si oboiboitu eng’ taitab Jehovah Kamuktaindeng’wong’, okwek, koboto werikwok, ak tibikwok, ak otwogikwok che murenik koboto otwogikwok che tibik, ak Lawindet ne mi kurgotikwok, amu matinyei inendet kebeberta anan borotet kobotok.
Ago imuchi ieny ak iam banyek eng’ kurgotiguk tugul, ko u ye machei muguleldang’ung’, ko u kaberuretab Jehovah Kamuktaindeng’ung’ ne kigogonin: amei ne ng’wan ak ne ma ng’wan, ko u cheptirgichet, ak ko u teweretiot.
Amat iam eng’ kurgotiguk kebebertab beguk, anan ne bo divaiguk, anan ne bo mwaniguk, anan che twatei tuguk anan che bo kechireguk, anan kaarortaosieguk alak tugul che iarortoi, anan kagochinoiguk che bo chamnyet, anan kagochinetab eunekwok ne kinamjin barak:
ago iame tukchoto eng’ taitab Jehovah Kamuktaindeng’ung’, inye, ak wering’ung’, ak cheptang’ung’, ak otwogeng’ung’ ne muren, ak otwogeng’ung’ ne tie, ak Lawindet ne mi kurgotiguk: ak ibaibaitu eng’ taitab Jehovah Kamuktaindeng’ung’ eng’ kiy age tugul ne iyae euneguk.
Ye katesun Jehovah Kamuktaindeng’ung’ kiwotet, ko u ye kiiarorun, ak ile, Amache aam banyek, amu machei sobondang’ung’ banyek; imuchi iam banyek, ko u ye machei sobondang’ung’.
Ak ngot ko loo eng’ inye ole leweni Jehovah Kamuktaindeng’ung’ konde kainennyi, ieny anyun che bo akweng’ung’ ak che bo kechireguk, che kigogonin Jehovah, ko u ye kiang’atin, ak iam eng’ kurgotiguk, ko u ye machei sobondang’ung’.
ak igoite kagochinoiguk che kibeelei, banyek koboto korotik, eng’ kaptisisietab Jehovah Kamuktaindeng’ung’: ak kirong’jin korotikab tiseiyweguk kaptisisietab Jehovah Kamuktaindeng’ung’, ak iam banyek.
Rib ak iepchi it ng’alechu tugul che kang’atin, si komieit eng’ inye ak eng’ lagoguk che biitu let agoi koigeny, ye iyae ne mie ak ne bo iman eng’ taitab Jehovah Kamuktaindeng’ung’.
ripgei anyun, si mariichin kot isub ichek, ye kageng’em bichoto eng’ taing’ung’; ak iteeb agobo kanamonikwak, ile Ootitoi ano bororiosiechu kanamonikwak? Si ayai agane ko u noto.
Ameyachi ko u noto Jehovah Kamuktaindeng’ung’: amu kiy age tugul ne wegot eng’ Jehovah, ne wechei inendet, ko kiyachi ko u noto ichek kanamonikwak; amu beelei agot werikwak ak tibikwak kobeeljin kanamonikwak.