“Chu kirwoogutik ak atebosyek che tuun oriibe oyae eng' emet ne ki koonok Kamuktaindet ne Toroor, Kamuktaindetap kwanisyeguk, kobunjiin kotee osaptosi eng' ng'wony.
Ong'em anyun ak owong'u oldinwek tugul ole kioote kanamonikwak pororyosyek che oluule. Ong'em oldinwek chooto tugul che mi tuloonook che kooen, che mi legemosyek ak che mi keetiik che tuonen keel.
Ocheeng' anyun ole menyei Kamuktaindet ne Toroor Kamuktaindeng'wong' eng' ole leweni ineendet eng' ortinwekwok tugul kole konde kainennyi. Yooto ye nyolu obe,
oibe kagoochinoikwok che kibeelei, tiseiywekwok, kebeberwekwok, kagoochinetap eunekwok ne kinamjin parak, kaarortaosyekwok, kagoochinoigap chamyet ak che twatei tuukwok ak keechiirekwok.
Ago ye kaolande eng' Jordan obe omeny emet ne koonok Kamuktaindet ne Toroor Kamuktaindeng'wong' onyaban ak kogoonok kamuung'et eng' puunikwok tugul che mi komoswek tugul, si omeng'iisyei eng' kaalyeet.
Egu anyun ole leweni Kamuktaindet ne Toroor Kamuktaindeng'wong' konde kainennyi kotebee, ole oibe koba tugul che ang'atook; kagoochinoikwok che kibeelei, tiseiywekwok, kebeberwekwok, kagoochinetap eunekwok ne kinamjin parak ak kaarortaosyekwok tugul che oarorchini Kamuktaindet ne Toroor.
Oboiboitu eng' olooto eng' taitap Kamuktaindet ne Toroor Kamuktaindeng'wong', okweek kobooto weeriikwok, tiibiikwok, otwogikwok che murenik kobooto otwogikwok che tiibiik ak Lawindet ne mi kurgotikwok, amu ma tinyei ineendet kebeberta anan poroteet kobootok.
“Ago imuuchi ieny ak iam panyeek eng' ole imenye ko uu ye machei muguleldang'ung', ko uu kaberuretap Kamuktaindet ne Toroor Kamuktaindeng'ung' ne ki kogoonin. Imuuchi koam ne ng'waan ak ne ma ng'waan ko ye ki ame kenyeleet anan teweretyot.
Amat oam eng' kurgotikwok kebebertap peeguk, anan ne po divaiguk anan ne po mwaniguk anan che twatei tuguuk anan che po keechiireguk anan kaarortaosyeguk alak tugul che iarortoi anan kagoochinoiguk che po chamyet anan kagoochinetap eunekwok ne kinamjin parak.
Ago iame tuguuchooto eng' taitap Kamuktaindet ne Toroor Kamuktaindeng'ung' inyee, weeriing'ung', cheptong'ung' ak otwogeng'ung' ne muren ak ne tye ak Lawindet ne mi kurgotiguk. Ak ibaibaitu eng' taitap Kamuktaindet ne Toroor Kamuktaindeng'ung' eng' kiy age tugul ne iyae euneguk.
“Ye katesun Kamuktaindet ne Toroor Kamuktaindeng'ung' kiwoteet ko uu ye ki iarorun, ak ile, ‘Amache aam panyeek, amu machei saboondanyu panyeek,’ imuuchi iam panyeek che tee che machei saboondang'ung'.
Ngot ko loo eng' inyee ole leweni Kamuktaindet ne Toroor Kamuktaindeng'ung' konde kainennyi, ieny anyun che po akweeng'ung' ak che po keechiireguk che ki kogoonin Kamuktaindet ne Toroor ko uu ye ki ang'atiin ak iam eng' kurgotiguk, ko uu ye machei saboondang'ung'.
ak igoite kagoochinoiguk che kibeelei, panyeek kobooto korotiik eng' kaptisisyetap Kamuktaindet ne Toroor Kamuktaindeng'ung'. Iroong'jin korotiigap tiseiyweguk kaptisisyetap Kamuktaindet ne Toroor Kamuktaindeng'ung' yeityo iam panyeek.
Riip ak iepchi iit ng'aleechu tugul che kang'atiin si komyeeit eng' inyee ak eng' lagoguk che piitu let agoi koigeny, ye iyae ne myee ak ne po iman eng' taitap Kamuktaindet ne Toroor Kamuktaindeng'ung'.
iriipkei anyun si ma riichin ak isup icheek, kogageng'em pichooto eng' taing'ung': ye iteep agobo kanamonikwak ile, ‘Ootitoi ano pororyosyechu kanamonikwak? Amache ayai agane ko uu nooto.’
Ameyachi ko uu nooto Kamuktaindet ne Toroor Kamuktaindeng'ung'. Amu kiy age tugul ne wegot eng' Kamuktaindet ne Toroor ne wechei ineendet, ko ki yachi ko uu nooto icheek kanamonikwak, amu peelei agot weeriikwak ak tiibiikwak kobeeljin kanamonikwak.