×

Ñanderuete Ñe’ẽ Porã 2015

13

1
Opu’ã ramo pende apytégui proféta térã ike pegua ohecháva, ha omoherakuã ramo peẽme techaukaha térã milágro,
2
ha ojehu ramo pe techaukaha térã pe milágro he’iva’ekue, ha upéi he’i ramo: Jaha ambue jára rapykuéri, peikuaa’ỹva, pemomba’eguasu hag̃ua ichupe;
3
napehenduiva’erã pe proféta upéva he’íva, térã ke pegua ohechávape; Jahve, pende Jára penera’ãsénte (pendeprovasénte) pehayhúpa añetehápe pende Ruetépe, pende py’aite guive ha pene ánga mbytete guive.
4
Peiko Jahve, pende Ruete rapykuéri, ichuguínte pekyhyjeva’erã, pejapo hembiapoukapykuéra ha pehendu iñe’ẽ, pemomba’eguasu ichupe ha peiko hapykuéri, Ha’e oipota háicha.
5
Peichagua proféta térã ke pegua ohecháva ojejukava’erã, oporohekombo’égui oñepu’ã hag̃ua Ñanderuete rehe, Ha’e ningo penerenohẽva’ekue Egípto retãgui tembiguái rekógui, ha’ekuéra ombyaisénte pende jerovia pende Jára rehe; ha peichagua tapicha pejuka ramo peguenohẽta mba’evai pende apytégui.
6
Ha he’i jevy jey ramo ndéve nde ryke’y, térã nde sy memby, térã nde ra’y, térã nde rajy, térã ne rembireko, térã ne irũ, he’ívo ñemiháme: Jaha ñamomba’eguasu ambue járape nde ha nde rukuéra oikuaa’ỹva’ekuépe,
7
ha oñemomba’eguasúva nde jerekuévo, tahi’ag̃ui ndehegui térã tamombyry, ko yvy apýra peteĩgui ambue apýra peve,
8
napeimeiva’erã hendive, ha ndapejapysakaiva’erã hese, ha pende resa ndoiporiahuverekoiva’erã ichupe, ha napemo’ãmo’ãiva’erã ichupe,
9
pejukava’erã uvei ichupe, nde po voi opu’ã tenondeteva’erã hese rejuka hag̃ua ichupe, ha upéi mayma tetãygua po nemoirũva’erã avei ko tembiapo kóvape.
10
Pejapiva’erã ichupe itápe omano meve, oñeha’ãgui nemboyke hag̃ua Jahve, nde Járagui, nerenohẽva’ekue Egípto retãgui, tembiguai rekógui.
11
Ko’ã mba’e mayma Israelgua tohendu okyhyje hag̃ua, ha oñemboyke hag̃ua ko’ã mba’evaígui.
12
Rehendu ramo oje’e peteĩ pende tavakuérape, Ñanderuete ome’ẽva’ekue peẽme peiko hag̃ua ipype,
13
osẽha pende apytégui kuimba’e heko vaíva ha omyakãrakúva umi tavayguápe, he’ívo: Jaha ñamomba’eguasu ambue járape, peẽ ndapeikuaáivape;
14
nde reporanduva’erã kyre’ỹpópe ha añete ramo pe oje’éva ha oiko pe mba’evaietéva pende apytépe,
15
upémaramo pejukava’erã katuete ichupekuéra kyse puku hãimbépe, itavayguakuérape hymbakuéra reheve, ha pehundiva’erã opaite mba’e ha’ekuéra oguerekóva guive.
16
Ha pembyatypava’erã imba’erepy oguerekóva guive hikuái pe pláza mbytépe ha pehapyva’erã tatápe mayma imba’erepykuéra ha avei pe táva, kuave’ẽmby ojehapypáva ramo Jahve, pende Ruetépe g̃uarã, ha oikóta ichugui tapere atýra opaite ára peve; ha araka’eve noñemopu’ãveiva’erã.
17
Ha umi mba’e oñemaldec i va’ekue anítei pegueraha pene mba’erã ramo, pehapypa uvei, upéicharamo Ñanderuete pochy ojeíta pende apytégui ha Ha’e pendeporiahuvereko jevýta, ha ohejáta peñemoña porã jevy, ome’ẽ haguéicha iñe’ẽ pende rukuérape,
18
upévare peneñe’ẽrendu Jahve, pende Jára ñe’ẽme; pejapo hembiapoukapy che ha’éva guive peẽme ko ára kóvape.
Guarani Bible 2015
Ñanderuete Ñe’ẽ Porã MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015
:
Guardar notas