A thie chaeih ta, a chaki a pachhaihpazy hry liata, hezy deikua he nama nie awpa châ vei: Râraoseihpa nata pazupi nata pihvao zy he ama thie chaeih ei ta, châhrasala ama chakie miano ta â pachhaih leipa vâta nama châta sa pathaih leipa a châ.
Vao he a chakie cha a pachhaih ta, châhrasala a thie a chaeih leipa vâta nama châta sa pathaih leipa a châ. A sa nama nie awpa châ leipa ta, thiruapa chhao nama hria awpa châ vei.
“Ano kho ta a thipa sa kheihawhpa hmah nama nie awpa châ vei. Nama khihzy liata a ypa chihropa nie awpa ta pie thei ei chi ta, râh hropa chyhsa hnohta nama zuah thei hra. Nâmo cha Abeipa nama Khazohpa châta phopi pathaihpa nama châ. Mie taw sa cha a panô sâhpiti ta nama chhoh awpa châ vei.
Abeipa nama Khazohpa china châh nama pahno lymâ thei nawpa ta, nama sâh, nama kresawhti, nama sathaw nata nama viahchao hri nata nama mietaku zaw hry liata a pataw tua chaipazy tawhta su hrawh su kha cha, Abeipa nama Khazohpa ta a moh y nawpa ta â tlyh awpa su liata, ano hmiakô liata nama nie tyh aw.
Abeipa nama Khazohpa ta byhnâ a cha pie ti ei ta, Abeipa nama Khazohpa ta a moh y nawpa ta â tlyh awpa su cha, nama yna tawhta a hla kawpa châ sala, su hrawh su kha cha, cha lâ a cheih thei awpa nama châ vei khiahta cha,
Tâkâ cha Abeipa nama Khazohpa ta a moh y nawpa ta â tlyh awpa su liata nama palôh khopa maih chalei nawpa ta nama hmâh aw. Viahchao tlyma, mietaku tlyma, kresawhti tlyma, kresawhti patapa tlyma, nama palôh khopa maih chalei aw ei chi ta, cha liata Abeipa nama Khazohpa hmiakô liata nâmo nata na chhôhkhazy nie aw ei chi ta, thaphapa ta nama y aw.
Nâmo hawhta tovyuh nata ryuto a hnei leipa Livai chi nama khih liata a ypazy, mapaihpazy, paw hnei leipazy nata nôhmeizy a vy aw ei ta, nie aw ei ta, rihbiepa ta ama y aw. Chatanachata Abeipa nama Khazohpa ta nama ku raihria zydua liata byhnâ a cha pie aw ei.