He he dyuchei ngiahthaina ryhpa a châ: Dyu pacheisatuhpa maihta a vaih dyuchei â ngiahthai awpa a châ. Abeipa ngiahthaina phuahpa a châ hapa vâta, a vaih nata a unawhpa dyuchei a hiah awpa châ vei.
Abeipa nama Khazohpa ta bie a châ taihpa hawh ei ta byhnâ a cha pie aw ei. Phopi hluhpi dyu pacheisa aw ei chi ta, nâmo deikua dyuchei aw veih ei chi. Phopi hluhpi chô liata ryu reih aw chi ta, âmo deikua nama chô liata ryureih aw veih ei.
“ Abeipa nama Khazohpa ta râh a cha piepa ei khih miakha liata nama unawhzy hry liata dyhchhiepa ama y khiahta cha, nama unawh dyhchhiepazy chô liata lôhkhô namâ hli awpa châ leipa ta, nama ku nama pako awpa châ vei.
A vaih teh u, chataleipatala, ‘Dyuchei ngiahthaina kô, kô sarina a vaw tlô daihmâ haw,’ tahpa ta nama unawh dyhchhiepa cha uasa a chhuah leipa ta, bao khoh leina palôh chhiepa nama hnei pathlei aw. Cha hawhta nama y khiahta cha, Abeipa lâ cha tlôkhei aw ei ta, nama châta moleina a châ aw.
Riapha kawpa ta nama pie awpa châ ta, nama pie tita a ngiapachhina palôh nama hnei awpa châ vei. Cha hawhta nama tao khiahta cha, Abeipa nama Khazohpa ta nama hmotaopa zydua nata nama raihria zydua liata byhnâ a cha pie aw ei.
Khatino rai ta dyhchhiepazy nama râh liata ama y aw. Chavâta, “Nama râh liata dyhchhiepa nata phahlapa nama unawhzy lâta nama ku pazawh muh vy,” tahpa ta bie ei cha pie ei.
“Nama unawhpa Hebrai chyhsa chapaw tlyma, chanô tlyma, nama hnohta zuapa ama châ khiahta cha, kô charu cha chakao aw ei ta, a kô sarina liata cha, khotalaina hnei awpa ta pua nama pasai awpa a châ.
Nama mietaku zaw, nama sawhri nata nama kresawhti saohpazy tawhta mochhih leipa ta nama pie awpa a châ. Abeipa nama Khazohpa ta byhnâ a cha piepa hawh ei ta, âmo chhao nama pie hra awpa a châ.
thua pazaopa la aw ei chi ta, ochhi pachhaipa ta ama nah vieh aw ei chi ta, chhâzaw ta nama sei ta ama y aw. Nama seichanô chô liata chhao, cha hawhta nama tao aw.
Nama unawhpa Hebrai seizy cha ahlaohpa hriapa lie no ta hria ei ta, kô charu ama cha chakao hapa vâta, khotalaina pie ta papua awpa cha, nama châta hmo ru tupa ta nama pachâ awpa châ vei. Abeipa nama Khazohpa ta nama hmotaopa zydua liata byhnâ a cha pie aw ei.
“Nama viahchao hri nata nama mietaku zaw hry liata a chapawpa a pataw tuapa maih cha, Abeipa nama Khazohpa châta nama panano awpa a châ. Nama viahchao hri liata a chapawpa a pataw tua chaipa cha, rai nama pahriasa awpa châ leipa ta, nama mietaku zaw hry liata a chapawpa a pataw tua chaipa hmi chhao nama ngyu awpa châ vei.
Sahroh chapawpa a pataw tuapazy cha, nâmo nata nama chhôhkhazy ta Abeipa ta su â tlyh awpa liata, Abeipa nama Khazohpa hmiakô liata kô chareih nama nie tyh awpa a châ.