|
| 1 |
|
| Só͘-ū phòa-siùⁿ, á-sī ū hâ-chhû ê gû iûⁿ, lín m̄-thang hiàn hō͘ Siōng Chú — lín ê Siōng-tè, in-ūi án-ni chòe sī Siōng Chú só͘ iàm-ò͘ⁿ--ê. |
|
| 2 |
|
| Tī Siōng Chú — lín ê Siōng-tè siúⁿ-sù lín ê siâⁿ, nā ū lâng, bô-lūn lâm lú, chòe Siōng Chú — lín ê Siōng-tè khòaⁿ-chòe pháiⁿ ê sū, ûi-pōe I ê iok, |
|
| 3 |
|
| khì ho̍k-sāi kèng-pài Siōng Chú só͘ kìm-chí hiah-ê sîn-bêng, kap ji̍t-thâu, ge̍h-niû, thiⁿ-téng ê bān-siōng; |
|
| 4 |
|
| nā ū lâng kā lín kóng ū lâng chòe chit-khoán tāi-chì, lín mā í-keng thiaⁿ--tio̍h, chiū tio̍h siông-sè tiâu-cha; nā kó-jiân sī sū-si̍t, chin-chiàⁿ tī Í-sek-lia̍t -lâng ê tiong-kan ū chit-khoán khó-ò͘ⁿ ê sū, |
|
| 5 |
|
| lín tio̍h chiong hit-ê lâng thoa-khì kóng-tiûⁿ, ēng chio̍h-thâu kā i tìm-sí. |
|
| 6 |
|
| Nā ū nn̄g ê á-sī saⁿ ê lâng chhut-lâi choh-chèng, tio̍h hō͘ hit-ê lâng sí; nā kan-ta chi̍t ê chèng-jîn, chiū m̄-thang hō͘ i sí. |
|
| 7 |
|
| Chèng-jîn tio̍h seng chhut-chhiú tìm i, jiân-āu chèng-lâng hē-chhiú hō͘ i sí; án-ni chiū tùi lín tiong-kan tû-khì chit-khoán siâ-ok ê sū. |
|
| 8 |
|
| Lín siâⁿ-lāi nā ū oh-tit phòaⁿ-toàn ê àn-kiāⁿ, bô-lūn sī thâi-lâng, á-sī sio-kò, á-sī siong-hāi, lín tio̍h khì Siōng Chú — lín ê Siōng-tè kéng-soán ê só͘-chāi, |
|
| 9 |
|
| chhéng-būn Lī-bī -lâng chòe chè-si--ê, kap ti̍t-pan ê sím-phòaⁿ-koaⁿ, in ōe chí-tō lín tio̍h án-chóaⁿ phòaⁿ-koat. |
|
| 10 |
|
| In tī Siōng Chú kéng-soán ê só͘-chāi chí-tō lín--ê, lín tio̍h chiàu án-ni chòe; in kà-sī lín--ê, tio̍h chiàu án-ni chun-hêng. |
|
| 11 |
|
| In tùi lín ê chí-tō, kap tùi lín kóng ê phòaⁿ-koat, lín lóng tio̍h chiàu án-ni chòe, m̄-thang phian-chó-phian-iū. |
|
| 12 |
|
| Nā ū lâng kiau-ngō͘ m̄ thiaⁿ-thàn ho̍k-sāi Siōng Chú ê chè-si, á-sī sím-phòaⁿ-koaⁿ, hit-ê lâng tio̍h hō͘ i sí; án-ni lín chiū tùi Í-sek-lia̍t -lâng ê tiong-kan tû-khì chit-khoán siâ-ok ê sū; |
|
| 13 |
|
| chèng-lâng thiaⁿ--tio̍h chiū ōe kiaⁿ, bô lâng káⁿ koh kiau-ngō͘ m̄ thiaⁿ-thàn. |
|
| 14 |
|
| Lín chìn-ji̍p Siōng Chú — lín ê Siōng-tè hō͘ lín chiàm-léng ê tōe, tī hia khiā-khí, nā koat-tēng beh chhin-chhiūⁿ sì-ûi ê lia̍t-kok siat-li̍p ông tī-lí lín, |
|
| 15 |
|
| lín it-tēng tio̍h siat-li̍p Siōng Chú — lín ê Siōng-tè kéng-soán ê lâng choh-ông; tio̍h tùi lín ê tông-pau siat-li̍p ông tī-lí lín; m̄-thang hō͘ m̄-sī lín tông-pau ê gōa-kok-lâng tī-lí lín. |
|
| 16 |
|
| Ông m̄-thang ūi-tio̍h ka-kī ke-thiⁿ chin chōe bé, mā m̄-thang in-ūi ài-beh khah chōe bé, hō͘ jîn-bîn tò-khì Ai-ki̍p; in-ūi Siōng Chú bat bēng-lēng lín, kóng, “Lín m̄-thang koh tò-khì hit-tiâu lō͘.” |
|
| 17 |
|
| Ông mā m̄-thang chhōa chin chōe pîn-hui, chiah bián i ê sim siū ín-iú lī-khui Siōng Chú; i mā m̄-thang ūi-tio̍h ka-kī lúi-chek chin chōe kim-gûn. |
|
| 18 |
|
| Ông khai-sí chē-ūi ê sî, tio̍h chiàu Lī-bī -lâng chòe chè-si--ê só͘ pó-chûn ê Lu̍t-hoat-su, ūi ka-kī chhau-siá chi̍t hūn. |
|
| 19 |
|
| Chit-hūn tio̍h hē tī ông hia, hō͘ ông chi̍t-sì-lâng tha̍k, thang ha̍k-si̍p kèng-ùi Siōng Chú — i ê Siōng-tè, chun-hêng chit-ê lu̍t-hoat it-chhè ê ōe kap só͘-ū ê lu̍t-lē; |
|
| 20 |
|
| chiah bián i chū-ko khòaⁿ-khin tông-pau, lī-khui chit-ê kài-bēng, phian-chó-phian-iū; thang hō͘ i kap i ê hō͘-tāi kú-tn̂g tī-lí Í-sek-lia̍t -kok. |
|
|
|
|