Chopchigei oret ak ipche kiwotosiekab emeng’ung’, ne konin Jehovah Kamuktaindeng’ung’ kobunjin, koek kebeberwek somok, si komuch komwechi chi age tugul ne karumis.
Ni ng’olyotab chito ne karumis, ne kamwechi oloto si kosob: inendet ne kabar chitab kokwennyi ama nai, ne kima kowechei inendet eng’ betusiek che kigosiirto;
ko u ye kawa chito timdo koeb ketit koboto chitab kokwennyi, ak ye kasut aiywet komachei koeb ketit, ak kochun aiywet eng’ kungit, ak kochililji aiywet chitab kokwennyi, ak kome; ingomwechi anyun age eng’ nganasochoto si kosob:
si mata kosub ne igeeri korotik rumindet, kota kolaldos neregekyik, ak konam, amu loo oret, ak kokwer kome; ago kima konyoljin meet amu kima kowechei inendet eng’ tai.
Ak ngobaraun Jehovah Kamuktaindeng’ung’ kiwoteng’ung’, ko u ye kigoyosiechi kwanisieguk, ak kogonin emet komugul ne kiiarorji kwanisieguk kole igochin;
Amenaktae kiwotetab chitab kokweng’ung’, ne kiindoi bik che bo keny, eng’ boroteng’ung’ ne inyabani, eng’ emet ne konin Jehovah Kamuktaindeng’ung’ kobunjin.
Amat kobaorianji chi baoriat agenge eng’ tengek age tugul, anan eng’ chalwok age tugul, eng’ lelut age tugul ne kayai: kigimiti ng’olyot eng’ ng’alekab baorinik aeng’ anan ko somok.