“Ye iwe obargei ak puuniguk ak iroo kotinyei paraisisyek, kariisyek ak piik che chaang' kosiirok, ko mat iywei. Amu mi Kamuktaindet ne Toroor Kamuktaindeng'ung' ne ki imutun imong'u eng' emetap Misiri kobooten.
Ye ibata, kong'alaalji piik `kandoik koleenji, ‘Tos mi chii ne kateech ko ne leel ama igoochi Kamuktaindet? Ngo mi, ko ingoweek kwo koonnyi si ma me eng' pooryeet ak kogoochi chiito age Kamuktaindet koonnyi.
Tos mi chii ne kimin mbareetap sabibuk ak tomo kobut logoekyik? Ngo mi ko ingoweek kwo koonnyi si ma me eng' pooryeet ak koboisyee chiito age logoekyik.
Ingong'alaalji `kandoik piik kogeny koleenji, “Ng'oo ne nyogoor ne machei kotanui? Ingoweek kwo koonnyi, si ma chootyo mugulelwegap tupchosyekyik ko uu nenyi.”
Ak ngo waluun kole ma chamei koyai kaalyeet eng' kwenung'ung' ak icheeget ak koyatun kurgotikwak, koegu anyun piik tugul che po nganasanooto otwogiguk ak kootin.
Ago luul kobunjiin kwony age tugul, lagok, tuuga ak tugul che mi nganaseet kobooto tuguuk tugul che mi olooto. Yeityo iam tuguugap puuniguk che kagoonin Kamuktaindet ne Toroor Kamuktaindeng'ung'.
Si ma ineetin isup iyai tuguukwak tugul che kiwechei, che ki koyachi kanamonikwak. Ngo yai ko uu nooto ko kochalwogenji Kamuktaindet ne Toroor kamuktaindeng'wong'.
“Ye kaiyiem nganaseet peetuusyek che chaang', imache ibar iluul, ko mat iep keetiikyik ing'em. Amu imuuchi iam che po keetichooto. Ameluul anyun, amu tos chii keetitap timiin ne tos iyiem?