Izi râh tawhta nama kaw pua nota, viahchhâ nata ti ta ama cha dy leipa vâta nata chhie cha sapa awpa ta Mesôpôtamia râh Pethô khih liata Beô sawchapawpa Bâlâma ama hruapa vâta, Abeipa pakhypi liata amâ hlao awpa châ vei.
Châhrasala Abeipa nama Khazohpa ta Bâlâma cha nathlie khoh vei. Abeipa nama Khazohpa ta kyh a cha pachâpa vâ ei ta, chhiesana cha nama châta byhnâ ta tlao a pachâsa haw.
“Nama hry liata chapaw ahy tlyma, zâ ta a baoti a puapa vâta pathaih leipa a châ khiahta cha, riehmo puasai chy aw ta, riehmo lâ a ngia mâh khao aw vei.
Nama hmobaohzy hry liata alei lina hnei aw chi ta, cha cha hmâpa ta lyupâh pua awpa ta khôtho liata namâ tyu nawpa su chao aw ei chi ta, nama lyupâh cha alei ta nama khu lilaw heih aw.
Cha pachha awpa ei nata nama chariahpazy nama hmiakô liata cha pie awpa ei ta, Abeipa nama Khazohpa cha nama riehmo liata a vaw hlai tyh tlôh aw ta, chavâta nama riehmo cha a pathaih awpa a châ. Chataleipatala nama hry liata hmo pathaih leipa hmô aw ta, a cha siesai pathlei aw ei.
“Izarei sawchanôzy hry liata nothlahpa achhyna o liata âzuahnô ta ama y awpa châ leipa ta, Izarei sawchapawzy hry liata chhao nothlahpa achhyna o liata âzuahpa ama y awpa châ vei.
Bie namâ taihpa châta pie awpa ta, chanô azuana ty nata chapaw azuana ty tawhta hmôpa sôhzy Abeipa nama Khazohpa o lâ nama cheih awpa châ vei. A miano heta Abeipa nama Khazohpa châta pasichhihpa a châ.
Chihropazy cha apôhna hneipa ta dyu nama pacheisa thei. Nama chiheihpazy deikua cha apôhna hneipa ta dyu nama pacheisa awpa châ vei. Chatanachata hnei awpa ta nama pangaipa râh liata nama raihria zydua liata Abeipa nama Khazohpa ta byhnâ a cha pie aw ei.
“ Abeipa nama Khazohpa lâta bie namâ taihpa a y khiahta cha, pahawh pasâh leipa ta nama pie awpa a châ. Chataleipatala Abeipa nama Khazohpa ta châ hnaw tlôh aw ei ta, nama châta moleina a châ pathlei aw.