×

Ika Bible 2018

Ditrọnọmi 23

1
Onyẹ ọwụlẹ wẹ wara mọbụ bepụ ẹhụ-okẹnnyẹ esọnkọ ndị nke Osolobuẹ zu.
2
Onwọnni onyẹ wẹ mụye ogbe k'e sọn ndị nke Osolobuẹ zu; ụmụ a esọnkọdẹ wẹ d'e ru agbọ nke iri.
3
Onwọnni onyẹ alị Amọnụ mọbụ onyẹ alị Mụabụ mọbụ nwa wẹ ọwụlẹ k'e sọn ndị nke Osolobuẹ zu d'e rudẹ ụmụ-ụmụ wẹ agbọ nke iri.
4
Makẹni ebuhẹnini wẹ ụnụ ihiẹn-oriri lẹ mirin kẹ ụnụ lala ogẹn ụnụ gi gha alị Ijiptu pụha, kama, e weridẹ wẹ Balaam nwa Bioru onyẹ Pẹtọ alị Aram-Naharaịm ọrụn n'ọ bụ ụnụ ọnụ,
5
Kanị Osolobuẹ wụ Chuku ụnụ egọnni Balaam ntịn, o gidẹ ngọzi nọkin ẹnya ọnụ ahụn wẹ te k'a bụ ọnụ, makẹni ihiẹn ụnụ sụọ Osolobuẹ wụ Chuku ụnụ.
6
Ụnụ e we nwụn, emẹkwọlẹ ni ihiẹn ọwụlẹ o gi rịnị wẹ mma.
7
Ajụkwọlẹ isọn onyẹ Ẹdọm mẹkọ, makẹni yụ lẹ ya wụ nwẹnẹ. Ajụkwọlẹ isọn onyẹ Ijiptu mẹkọ, makẹni ụnụ a nọgụọ alị wẹ nọkẹ itumunyẹ.
8
Ụmụ-ụmụ wẹ lẹ ndị sọnni wẹ nwọn ikẹn banyeni ndị nke Osolobuẹ.
9
Ụnụ rị imẹ ọdụ ebe ụnụ jẹn d'a lụsọn ndị-iṅẹnrẹn ụnụ agha, sọkwọ nị ihiẹn ọwụlẹ rụnị.
10
Omẹni o nwọn ihiẹn gha okẹnnyẹ ọwụlẹ rị imẹ igunrun ụnụ ẹhụ pụha imẹ uhinhin, hụn mẹ ẹ rụ, okẹnnyẹ ahụn ya gha imẹ igunrun ụnụ pụ d'a nọdị ụsụọ.
11
Kanị o rumẹ ẹnyasị, ọ wụ ẹhụ, anwụn rọgụ o kinhẹn imẹ agọ ahụn.
12
E mẹmẹrin ni ebe ụnụ k'a gha e jẹn azụn-ụlọ ụsụọ agọ agha ụnụ.
13
Ihiẹn mẹ ẹkẹrẹ wẹ gi e gu alị k'a rịrị ibu onyẹ-onyẹ imẹ ụnụ, i jẹngụ azụụn-ụlọ, y'e gi ẹ guru ẹjan, y'e gbehutọ, kpumẹ ihiẹn ị nyụn.
14
Makẹni Osolobuẹ wụ Chuku ụnụ a ghahunmẹ imẹ agọ ụnụ, e che ụnụ nche, e we ndị-iṅẹnrẹn ụnụ e che ụnụ ẹka nị ụnụ mẹri wẹ. Agọ ụnụ sikọ d'a rịrịrị nsọ, amamgbe o legha ihiẹn ọwụlẹ rịlẹni mma ẹnya, gbakitọ ụnụ azụụn.
15
Omẹni igbọn ịhịan a gbaha d'e gbọnn'i, ewelẹ ẹ hụ chezi di-nwọnn'ẹ ẹ ẹka.
16
Ẹlẹ ọhụn sụọ, nịdẹ n'a biri ebe ọwụlẹ sụọn'a imẹ igunrun ụnụ, imẹ obodo ọwụlẹ ọ chọ. Eyekwọlẹ n'a mmẹkp'ẹhụ.
17
Onwọnkwọnị okpoho Izrẹlụ ọwụlẹ k'a wụ ịgbaraja ụlọ-mmọn; onwọnzikwọnị okẹnnyẹ Izrẹlụ ọwụlẹ k'a wụ ịgbaraja ụlọ-mmọn.
18
Ewẹhẹkwọlẹ ni egho-ọrụn ịgbaraja okpoho mọbụ okẹnnyẹ d'e mẹzu nkwa ọwụlẹ imẹ ụlọ Osolobuẹ wụ Chuku ụnụ, makẹni wẹ ẹbụbụọ rụ arụ ẹnya Osolobuẹ wụ Chuku ụnụ.
19
Anakwọlẹ onyẹ Izrẹlụ ibe i ọmụnịnwa: kẹ egho kẹ ihiẹn-oriri kẹ ihiẹn ọzọ ọwụlẹ w'a na ọmụnịnwa a.
20
I nwọn ikẹn na otumunyẹ ọmụnịnwa, kanị anakwọlẹ onyẹ Izrẹlụ ibe i, kẹni Osolobuẹ wụ Chuku ụnụ hụn ụzọ gọzi ihiẹn ile i buche ẹka imẹ alị ahụn ụnụ banyekọ d'e weri.
21
Omẹni i kwe Osolobuẹ wụ Chuku ụnụ nkwa, ebielẹ d'a ku a, makẹni Osolobuẹ wụ Chuku ụnụ k'a dọkwọ ị ya, ogẹn ahụn ikpe njọ a ma ị.
22
Omẹni y'e kweni nkwa, ẹlẹ njọ.
23
Dọnrin ẹnya mẹ ihiẹn ọwụlẹ i gi ọnụ ị ku, makẹni ịyụ gi ọnụ ị kwe Osolobuẹ wụ Chuku ụnụ nkwa, awanị w'a ye i olu.
24
I banye alị vaịnị ibe i, i nwọn ikẹn ra ogbe ole ị chọ n'ị ra, ka ebuchelẹ hụn ọwụlẹ imẹ ụkpalị ị;
25
i banye alị ọka-witi ibe i, i nwọn ikẹn gi ẹka ghọrị, ka egikwọlẹ ọpịa beri ọka rị ugbo ibe i.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes