To goɗɗo te'i debbo, nden o wanyi mo ngam o tawi goɗɗum cemtuɗum haa maako. Nden kam o winndana mo ɗereewol ceergal, o hokka mo ngol, o wurtina mo saare maako.
nden kam, goriiko arano ceerunooɗo mo waawataa wartirgo mo haa o laato debbo maako ɓaawo o laari mo bana coɓɗo, ɗum nyidduɗum haa yeeso Jawmiraawo. Taa on mbaɗa hakke dow lesdi ndi Jawmiraawo, Allah mooɗon hokkata on ngam maron.
To goɗɗo te'i debbo, duuraay tawon, taa o nasta jama'aare konu, taa on njowana mo kuugal koo ngale. Acce mo o jooɗo bee debbo maako haa saare hitaande woore, o seyna debbo maako mo o ɓaŋgi.
To a tawi goɗɗo wujji gooto caka banndiraaɓe mum Isra'iila'en, macciɗini ɗum malla soorri ɗum, nden kam o mbareteeɗo. Bana non ittirton halleende nde'e caka mooɗon.
Nyalaade fuu hokku mo ngeenaari maako hiddeko naaŋge muta. Ngam o woodi haaje ngeenaari man masin. To a yoɓaay mo, o wulloto ma haa Jawmiraawo, an boo ɗum laatanto ma hakke.
Sey on ciftora no onon boo on laatino maccuɓe haa Misra. Ammaa Jawmiraawo, Allah mooɗon rimɗini on diga ton. Ngam maajum umrumi on huuwugo fodde wolde nde'e.
To on ɗon coda ngesa mon, to on ngejjiti cammeeje goɗɗe haa ngesa, taa lorte ngam suɓtugo ɗe. Accane ɗe hoɗɓe jananɓe e atiime'en e rewɓe yurumɓe. Nden kam Jawmiraawo, Allah mooɗon barkiɗinan kuuɗe mon fuu.