×

Mara Bible BSI 2023

Olrhaepnah 25

1
“Chyhsazy ta ama likah liata biepeipa ama hnei khiahta cha, ryureina lâ tlôkhei aw ei ta, ryureituhpazy ta ama pachia aw. Mosiapa cha thai pachâsa aw ei ta, moleipa cha thailei ama pachâsa aw.
2
Moleipa cha tu tlâh a châ khiahta cha, ryureituhpa ta paziasa aw ta, ryureituhpa hmiakô liata ama tu aw. A moleina yzie hawhta, ei khazie tu awpa ma tahpa raopa a châ aw.
3
Ei sypalih taih tu theipa châ ta, cha hlâta a hluh via awpa châ vei. Tu awpa zie bitaipa khô lâta ei hluhpi tupa a châ khiahta cha, nama mohmô liata nama unawhpa nama pamaophyuhsa tu pathlei aw.
4
“Viahchao tôhpa sâh a tly nota a hmao nama hi awpa châ vei.
5
“Unawhzy o kha liata pahrâ khoh ei sala, ama hry liata pakha sawchapaw hnei leipa ta a thi khiahta cha, athipa lapinô cha chhôhkha khôtho lâ dyh a châ awpa châ vei. A vahpa unawhpa ta ano lâ a ngia aw ta, lapinô ta hnei aw ta, vahpa unawhpa tao awpa a chô liata a tao aw.
6
Izarei hry liata a unawhpa moh a lei lei nawpa ta, a unawhpa lapinô a hneipa ta sawchapaw a sa tua chaipa cha, a unawhpa athipa moh a phaoh awpa a châ.
7
Unawh ahrohpa ta a unawhpa athipa lapinô cha a hnei khoh vei khiahta cha, a unawhpa lapinô cha thokhy chhikao liata machâzy lâ khy aw ta, ‘Ei vahpa unawhpa ta Izarei hry liata a unawhpa moh paysa lymâ awpa khoh leipa ta, vahpa unawhpa tao awpa ei chô liata tao khoh vei,’ a tah aw.
8
Khihpi machâzy ta chapaw cha aw aw ei ta, rei khei aw ei ta, ano ta, ‘Hnei khoh va na,’ khâchâ a tah ha khiahta cha,
9
a unawhpa lapinô ta machâzy hmiakô liata ano lâ pangai aw ta, a pheiky pahluhpa aw ta, a hmia liata a pachih pachhao aw ta, ‘A unawhpa chhôhkha a padua khoh leipa cha, a chô liata he hawhta taopa châ mawh sy,’ a tah aw.
10
Chatanachata a pathlazy cha, ‘A pheiky pahluhpa chhôh,’ tahpa ta Izarei hry liata pahnopa ama châ aw.
11
“Chyhsa a tu ei sala, pakhapa lapinô ta a vahpa pachha a chhuahpa ta, a vahpa a tu haipa cha, a chapaw chhaichhi liata a patu khiahta cha,
12
a ku nama taipa awpa a châ. Nama ngiachhie awpa châ vei.
13
“Nama sahria liata khopathliahna lô laipa nata chyhpa chi nanopazy namâ vao awpa châ vei.
14
Nama o liata panuana laipa nata chyhpa chi nanopazy nama hnei awpa châ vei.
15
Khopathliahna tlohpa nata dopa nama hnei awpa châ ta, panuana tlohpa nata dopa nama hmâh awpa a châ. Chatanachata Abeipa nama Khazohpa ta râh a cha piepa ei liata nama hro a pareih aw.
16
Cha hawhpa hmozy tao ta, â doleipa ta a taotuhpa zydua cha, Abeipa nama Khazohpa châta pasichhihpa ama châ.
17
“Izi râh tawhta nama kaw pua nota, Amale mo ta lâpi liata ama cha taozie kha a thei thlâh ha muh vy.
18
Nama riethei thachhâ lichih ta, lâpi liata châ vaw byh ei ta, hnôh a chhâhpa, chiehleipa hnôh a khawpa zydua ama thie khai haw. Khazohpa china rai hnei veih ei.
19
Chavâta Abeipa nama Khazohpa ta ryuto châta hnei awpa ta râh a cha piepa ei liata, nama chheipâh liata nama chariah zydua tawhta Abeipa nama Khazohpa ta a cha pahâsa ti ei ta, Amale mo cha avâ ry liata a thei thlâhpa ama châ khao lei nawpa ta, nama pahleipadia khai ha awpa a châ. Nama my cheita awpa châ vei.
Chin BSI Bible 2023
The Bible Society of India 2023
:
Save Notes