oddiranga ku bibala ebisooka eby'ebibala byonna eby'ettaka lyo by'obanga okungudde mu nsi Omukama Katonda wo gy'agenda okukuwa, n'obissa mu kisero n'obitwala mu kifo Omukama Katonda wo ky'alibanga alonze ng'ekisulo ky'erinnya lye.
N'ogenda eri kabona abeerangawo mu budde obwo n'omugamba nti: ‘Olwa leero njatula mu maaso g'Omukama Katonda wo nti nnyingidde mu nsi gye yalayirira bajjajjaffe nti aligituwa.’
Olwo n'oyogera bw'oti mu maaso g'Omukama Katonda wo: ‘Ekitundu ekitukuvu nkiggye mu nnyumba yange ne nkiwa Omuleevi, omugwira, mulekwa ne nnamwandu okusinziira ku biragiro byo byonna nga bwe wandagira. Saava ku biragiro byo era saabyerabira.
Ku byo saalina kye nalyako nga ndi mu kukungubaga, mpaawo kye naggyako nga siri mulongoofu, saalina ku kyo na kimu kye nawa mufu. Nawulira eddoboozi ly'Omukama Katonda wange, byonna ne mbituusanga nga bwe wandagira.
Yima mu ggulu, otunule wansi ku maka go amatukuvu, owe omukisa abantu bo Yisirayeli n'ensi gye watuwa nga bwe walayirira bajjajjaffe, ensi ekulukuta amata n'omubisi gw'enjuki.’
Ajja kukuyitimusa mu kitiibwa, mu ttutumu ne mu bukulu okusinga amawanga gonna ge yakola. Olibeera ggwanga ttukuvu eri Omukama Katonda wo, nga bwe yayogera.”