×

Ika Bible 2018

Ditrọnọmi 27

1
Mozizi lẹ ndị-ichẹn Izrẹlụ wị gwa ndị Izrẹlụ oku, Mozizi sị, “Mẹchanrịnkwọ nị ihiẹn ndịnị ile m rị a gwa ụnụ tannị.
2
Ụnụ fetugụ Iyi Jọdanị banye alị ahụn Osolobuẹ wụ Chuku ụnụ ri e ye ụnụ, tumẹsọnmẹ ni ọmụma ndị hi-ogbe, ụnụ e gi simẹnti te wẹ ile,
3
ụnụ e dechanrịn ihiẹn ile rị imẹ iwuni ye wẹ, ụnụ fetugụ d'a banye alị ahụn Osolobuẹ wụ Chuku ụnụ rị e ye ụnụ, alị ahụn mirin-ẹran anụ lẹ mirin-ẹnwụn jun, e hu, nọkẹ kẹ Osolobuẹ wụ Chuku ndị nẹdi ụnụ dọn kwe ụnụ nkwa.
4
Ụnụ fetu nwan Iyi Jọdanị, tumẹ ni ọmụma ndị ahụn ye Ugu-Ẹbalụ kẹ m dọn gwa ụnụ tannị, ụnụ e gi simẹnti te wẹ.
5
Rụn nị nị Osolobuẹ wụ Chuku ụnụ ukpo nchụn-ẹjan ebahụn, ukpo nchụn-ẹjan ọmụma. Egikwọlẹ ni ihiẹn-ọrụn igwe mẹ ihiẹn ọwụlẹ rịn'a.
6
Ọmụma wẹ belẹni kẹ ụnụ e gi rụnnị Osolobuẹ wụ Chuku ụnụ ukpo nchụn-ẹjan, ụnụ a nọ elu ẹ chụnyeni Osolobuẹ wụ Chuku ụnụ ẹjan w'a dụn ọkụn.
7
Chụn nị ẹjan-ekele ebahụn, ụnụ e ri wẹ, ghọghọ ihun Osolobuẹ wụ Chuku ụnụ;
8
ụnụ e de ihiẹn ile rị imẹ iwuni ye elu ọmụma ndị ahụn ụnụ tumẹ, de ẹ ọhụnma n'ọ nị gụn.”
9
Ya Mozizi lẹ ndị nchụn-ẹjan, ndị Livaị, nọ sị ndị Izrẹlụ ile, “Ndị Izrẹlụ-o, gba nị nkịtịn; ụnụ e gọn ntịn! Ụnụ e họnringụọ nwan ndị nke Osolobuẹ wụ Chuku ụnụ.
10
Humẹni ni Osolobuẹ wụ Chuku ụnụ isi, ụnụ e mẹ ihiẹn ndị ọ sị ụnụ mẹ lẹ iwu ndị m rị e ye ụnụ tannị.”
11
Ụhụọhịn ohu ahụn, Mozizi nọzị sị ndị Izrẹlụ:
12
Ụnụ fetugụ Iyi Jọdanị, ebọn ndịnị wẹ sikọ d'e wuzo Ugu-Gẹrizim, gọzi ndị Izrẹlụ: Simiọnụ, Livaị, Juda, Isaka, Josẹfụ lẹ Bẹnjamini,
13
ndịnị e wuzo Ugu-Ẹbalụ bụ ọnụ: Rubẹni, Gadị, Asha, Zẹbulọnụ, Danị lẹ Naf'tali.
14
Ndị Livaị sikọ d'e weshi olu elu a sị ndị Izrẹlụ:
15
“Ịbụ-ọnụ ya rịnị onyẹ sikọ d'a kpụ mọbụ pịn mmọn hụn wụ arụ ẹnya Osolobuẹ, ọrụn-ẹka omẹ-nka lẹ onyẹ hụn gi nzuzue kọma mmọn.” Ịhịan ile sị, “Isẹẹ!”
16
“Ịbụ-ọnụ ya rịnị onyẹ ghalẹni a gbaye nẹdi ẹ mọbụ nnẹ ẹ.” Wẹ kugụ a, ịhịan ile sị, “Isẹẹ!”
17
“Ịbụ-ọnụ ya rịnị onyẹ hụn e wepụ ihiẹn-okẹn ibe ẹ.” Ịhịan ile sị, “Isẹẹ!”
18
“Ịbụ-ọnụ ya rịnị onyẹ dufie ẹnya-ishi.” Ịhịan ile sị, “Isẹẹ!”
19
“Ịbụ-ọnụ ya rịnị onyẹ k'a napụ ndị abịamabịa, ndị nwọnlẹni nẹdi lẹ nnẹ lẹ ikpoho di wẹ nwụnhụn ihiẹn runi wẹ.” Ịhịan ile sị, “Isẹẹ!”
20
“Ịbụ-ọnụ ya rịnị onyẹ hụn k'e sọn nwunyẹ nẹdi ẹ ranhịn, makẹni ọ gbagụọ nẹdi ẹ ọtọ.” Ịhịan ile sị, “Isẹẹ!”
21
“Ịbụ-ọnụ ya rịnị onyẹ hụn k'e sọn anụ ọwụlẹ ranhịn.” Ịhịan ile sị, “Isẹẹ!”
22
“Ịbụ-ọnụ ya rịnị onyẹ hụn k'e sọn nwẹnẹ ẹ okpoho ranhịn, kẹ nwa-nẹdi ẹ kẹ nwa-nnẹ ẹ.” Ịhịan ile sị, “Isẹẹ!”
23
“Ịbụ-ọnụ ya rịnị onyẹ hụn k'e sọn nnẹ-nwunyẹ ẹ ranhịn.” Ịhịan ile sị, “Isẹẹ!”
24
“Ịbụ-ọnụ ya rịnị onyẹ hụn k'e gi nzuzue gbu ibe ẹ.” Ịhịan ile sị, “Isẹẹ!”
25
“Ịbụ-ọnụ ya rịnị onyẹ hụn k'a narịn ihiẹn ọwụlẹ n'o gbu onyẹ mẹlẹni ihiẹn w'e gi gbu ẹ.” Ịhịan ile sị, “Isẹẹ!”
26
“Ịbụ-ọnụ ya rịnị onyẹ hụn jụ n'o dọnmẹkọ ihiẹn ndị rị iwuni gi kwadọn wẹ.” Ịhịan ile sị, “Isẹẹ!”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes