1
तब इस्राएलका अगुवाहरूसित मिली मोशाले मानिसहरूलाई भने, “मैले आज तिमीहरूलाई दिँदैगरेका सबै आदेशहरू पालन गर।
2
यर्दन नदी पार गरी परमप्रभुले तिमीहरूलाई दिन लाग्नुभएको देशमा पस्दा तिमीहरूले केही ठूल्ठूला ढुङ्गाहरू खडा गरी कमेरोले पोत्नू
3
र यी सबै नियम र आदेशहरू तिनमा लेख्नू। परमप्रभु तिम्रा पुर्खाका परमेश्वरले प्रतिज्ञा गर्नुभएको धनी र मलिलो देशमा पसिसकेपछि
4
जब यर्दनको पारिपट्टि पुग्छौ, तब मैले आज तिमीहरूलाई भनेझैँ ती ढुङ्गाहरू तिमीहरूले एबाल पहाडमा खडा गरी कमेरोले पोत्नू।
5
त्यहाँ कुनै फलामको औजारले नछोएको ढुङ्गाको एउटा वेदी बनाउनू
6
किनभने तिमीहरूले परमप्रभु आफ्ना परमेश्वरको निम्ति बनाएको कुनै पनि वेदी औजारले नकाटिएका ढुङ्गाले बनाउनुपर्छ। त्यहाँ तिमीहरूले आफ्ना होमबलिहरू चढाउनू,
7
मेलबलिहरू चढाएर खानू अनि परमप्रभु आफ्ना परमेश्वरको सामु धन्यवादी हुनू।
8
कमेरोले लिपेका ढुङ्गाहरूमा परमेश्वरका नियमहरू प्रत्येक शब्द सफासित लेख्नू।”
9
तब लेवी पूजाहारीहरूसित मिलेर मोशाले इस्राएलका सबै मानिसहरूलाई भने, “हे इस्राएलका जन हो! मतिर ध्यान देओ र मेरा कुरा सुन। आज तिमीहरू परमप्रभु तिम्रा परमेश्वरका प्रजा भएका छौ।
10
यसकारण उहाँका आज्ञा मान र मैले आज दिँदैगरेका सबै उहाँका नियमहरू पालन गर।”
11
त्यसपछि मोशाले इस्राएलका मानिसहरूलाई भने,
12
“तिमीहरूले यर्दन तरिसकेपछि मानिसहरूलाई आशीर्वाद दिएका बेलामा शिमियोन, लेवी, यहूदा, इस्साखार, योसेफ र बेन्यामीन कुलहरू गीरीज्जीम पहाडमा खडा रहनू।
13
अनि सराप दिएका बेलामा रूबेन, गाद, आशेर, जबूलून, दान र नप्ताली कुलहरू एबाल पहाडमा खडा रहनू।
14
लेवीहरूले यी शब्द उच्च स्वरले भन्नेछन्:
15
“जसले ढुङ्गा, काठ वा धातुको मूर्ति बनाएर गुप्तमा त्यसको पूजा गर्छ, त्यसमाथि परमेश्वरको सराप परोस्। परमप्रभुले मूर्तिपूजा घिन गर्नुहुन्छ।” तब सबै मानिसहरूले भन्नेछन्, “आमेन!”
16
“आमा-बुबाको अनादर गर्नेमाथि परमेश्वरको सराप होस्।” अनि सबै मानिसहरूले भन्नेछन्, “आमेन!”
17
“छिमेकीको साँध-सिमाना हटाउनेमाथि परमेश्वरको सराप परोस्।” अनि सबै मानिसहरूले भन्नेछन्, “आमेन!”
18
“अन्धालाई भुल बाटो देखाउनेलाई परमेश्वरको सराप परोस्।” अनि सबै मानिसहरूले भन्नेछन्, “आमेन!”
19
“परदेशी, टुहुरा-टुहुरी र विधवाका हक खोस्नेमाथि परमेश्वरको सराप परोस्।” अनि सबै मानिसहरूले भन्नेछन्, “आमेन!”
20
“बुबाकी कुनै स्वास्नीसित सम्भोग गरेर आफ्ना बुबाको अपमान गर्नेलाई परमेश्वरको सराप परोस्।” अनि सबै मानिसहरूले भन्नेछन्, “आमेन!”
21
“पशुसित सम्भोग गर्नेमाथि परमेश्वरको सराप परोस्!” अनि सबै मानिसहरूले भन्नेछन्, “आमेन!”
22
“आफ्नी बहिनी र सौतेनी बहिनीसित सम्भोग गर्नेमाथि परमेश्वरको सराप परोस्।” अनि सबै मानिसहरूले भन्नेछन्, “आमेन!”
23
“आफ्नी सासूसित सम्भोग गर्नेमाथि परमेश्वरको सराप परोस्।” अनि सबै मानिसहरूले भन्नेछन्, “आमेन!”
24
“लुकेर हत्या गर्नेमाथि परमेश्वरको सराप परोस्!” अनि सबै मानिसहरूले भन्नेछन्, “आमेन!”
25
“निर्दोष मानिसको हत्या गर्नलाई घुस लिने मानिसमाथि परमेश्वरको सराप परोस्।” अनि सबै मानिसहरूले भन्नेछन्, “आमेन!”
26
“परमेश्वरका सबै आज्ञा र शिक्षाहरू नमान्नेमाथि परमेश्वरको सराप परोस्।” अनि सबै मानिसहरूले भन्नेछन्, “आमेन!”
Nepali Bible 2008
Simple Nepali Holy Bible Nepal Bible Society, 2008