“यहोवा तू पचन्क ओन दुस्मनन पइ विजयी बनाई जउन तोहरे खिलाफ होइहीं। तोहार दुस्मन तोहरे खिलाफ एक रस्ता स अइहीं मुला उ पचे तोहरे समन्वा सात ठु राहे मँ पराइ जइहीं।
तू पचन्क ओन सिच्छन मँ स कउनो क उपेच्छा नाहीं करइ चाही जेनका मइँ आजु तू पचन्क देत हउँ। तू पचन्क ऍनसे दाई या बाई कइँती नाहीं जाइ चाही। तू पचन्क उपासना बरे दूसर देवतन क पाछे नाहीं चलइ चाही।
“अगर तू पचे बुरा काम करब्या अउर आपन यहोवा स मुँह फेर लेब्या, तउ तू पचे अभिसाप पउब्या। तू पचे जउन कछू करब्या ओहमाँ तू पचन्क क अव्यवस्था अउ फटकार क सामना करइ क होइ। उ इ तब तलक करी जब तलक तू पचे हाली स अउ पूरी तरह स बरबाद नाहीं होइ जात्या।
अगर तू पचे यहोवा क हुकुम नाहीं मनत्या तउ उ तू पचन्क तब तलक महामारी स दुखी करत रही जब तलक तू उ देस मँ पूरी तरह बरबाद नाहीं होइ जात्या जेहमाँ तू पचे रहइ बरे प्रवेस करत अहा।
यहोवा तू पचन्क रोग स दुखी अउ दुर्बल होइ क दण्ड देइ। तू पचन्क बोखार अउ सूजन होइ। यहोवा तोहरे लगे भयंकर गर्मी पठइ अउर तोहरे हिआँ बर्खा नाहीं होइ। तोहार फसलन गर्मी अउ रोग स बरबाद होइ जइहीं। तू पचक इ सबइ मुसीबतन तब तलक अइहीं जब तलक तू पचे मर नाहीं जात्या।
तू पचन्क दिन क प्रकास मँ आँधर क नाई आपन राह टटोलइ क होइ। तू पचे जउन कछू करब्या ओहमाँ तू पचे असफल रहब्या। लोग तू पचन्क बार बार प्रहार करिहीं अउर तोहार चिजियन क चोरइहीं। तू पचन्क बचावइवाला हुआँ कउनो भी न होइ। चीज हेराइ क अभिसाप
“यहोवा तू पचन्क अउ तोहरे राजा जेका तू आपन बरे चुनेस ह, क उ रास्ट्र म पठइ जेका तू पचे नाहीं जानत होब्या। तू पचे अउ तोहार पुरखन उ रास्ट्र क कबहुँ नाहीं लखे होइहीं। हुआँ तू पचे काठ अउ पाथर क बने भए दूसर देवतन क पूजब्या।
तू पचे अंगूरे क बगिआ लगउब्या अउ ओहमाँ कठिन मेहनत करब्या। मुला तू पचे ओहमाँ स अंगूर बटोरब्या नाहीं अउ न ही ओनसे दाखरस पीब्या। काहेकि ओनका किरवन खाइ लेइहीं।
“इ सबइ अभिसाप तू पचन्प पड़िहीं। उ पचे तोहार पाछा तब तलक करत रइहीं अउर तू पचन्क गहियाइके धरे रइहीं जब तलक तू पचे बरबाद नाहीं होइ जात्या। काहेकि तू पचे यहोवा आपन परमेस्सर क कही भइ बातन क परवाह नाहीं किह्या। तू पचे ओकरे ओन आदेसन अउ नेमन क नाहीं मान्या जेका उ तू पचन्क दिहस।
एह बरे तू पचे आपन ओन दुस्मनन क सेवा करब्या जेनका यहोवा, तोहरे पचन्क खिलाफ पठइ। तू पचे भूखा, पिआसा अउर नंगा रहब्या। तोहरे लगे कछू भी न होइ। यहोवा तोहरी गर्दन पइ एक ठु लोहे क जुवा तब तलक धरी जब तलक तू पचन्क बरबाद नाहीं होइ जाइ।
“यहोवा तोहरे खिलाफ बहोत दूर स एक रास्ट्र क लिआइ। इ रास्ट्र पृथ्वी क दूसर कइँती स आइ। इ रास्ट्र तोहरे ऊपर अकासे स उतरत उकाब पंछी क नाई हाली स हमला करी। तू पचे इ रास्ट्र क भाखा नाहीं समुझ पउब्या।
जब तलक तोहार दुस्मन तोहरे सहर क घेरा डाए रही तब तलक तोहार बड़का नोस्कान होत रही। तू पचे ऍतना भूखा रहब्या कि आपन गदेलन क भी खाइ जाब्या। तू पचे आपन पूतन अउ बिटियन क गोस खाब्या जेनका यहोवा तोहार परमेस्सर तू पचन्क दिहे बाटइ।
“तोहरे पचन्क बीच सब त जियादा विनम्र अउ सुकुमार मेहरारु भी उहइ करी। अइसी धन्नासेठ अउ सुकुमार मेहरारु भी जउन कहूँ जाइ बरे भुइँया पइ गोड़ भी न रखे होइ। उ आपन पियारा भतार या गदेलन क संग हींसा बँटावइ क विरोध करी।
तू पचे ऍतना जियादा होइ सकत ह जेतना अकासे मँ तारा अहइँ। मुला तू पचन मँ कछू ही बचा रइहीं। तू पचन्क संग इ काहे होइ? काहेकि तू पचे यहोवा आपन परमेस्सर क बात नाहीं मान्या।
यहोवा तू पचन्क पृथ्वी क एक छोरे स दूसर छोर तलक संसार क सबहिं लोगन मँ बिखेर देइ। हुआँ तू पचे दूसर काठ अउ पाथर क देवतन क पूजब्या जेनका तू पचे अउ तोहार पुरखन कबहुँ नाहीं पूजेन।