Muusa tokki wi'ugo: “To on kakkilani bolle Jawmiraawo, Allah mooɗon, to on ɗowtanake umrooje maako ɗe umranmi on hannde fuu, nden kam Jawmiraawo, Allah mooɗon yowan on dow ummaatooje duniyaaru fuu.
To on ɗowtanake umrooje Jawmiraawo, Allah mooɗon, to on tokkake laabi maako fuu, nden kam o tabitinan on haa on laato ummaatoore maako senaande, bana o hunani on.
To on kakkilani umrooje Jawmiraawo, Allah mooɗon ɗe umranmi on hannde, to on ɗowtanake ɗe, Jawmiraawo laatinan on hoore ummaatooje, naa wicco maaje. On ɓesdoto yeeso yeeso, on leestataa sam.
“Ammaa to on paalaay wolde Jawmiraawo Allah mooɗon, ngam hakkilango e ɗowtango umrooje maako fuu e farillaaji maako fuu ɗi umranmi on hannde, nden kam naalooje ɗe'e fuu ngaran dow mooɗon.
Jawmiraawo waddan naaloore e saklere e ɓillaare dow kuuɗe ɗe on kuuwata fuu, haa on natta fuu, on kalka law, daliila halleende mooɗon nde on mbaɗi, ngam on ngudini mo.
Jawmiraawo ukkanan on nyawuji ciiɓanɗi on e jonte e ɓuule e nguli, o yoornan e nyolnan alkamaari mon boo. Masiibooji ɗi'i fuu tokkoto on, haa to on maayi.
Nyalawma on ngiiloto, on ɗaɓɓitan laawol bana wumɓe, ammaa on keɓtataa ngol. On keɓataa hayru nder kuuɗe mon fuu. Nyalɗe fuu konne'en ɓillan on, njaɓtan on, walaa kisnanɗo on.
Jawmiraawo dahan on, onon e laamiiɗo mo on laamini dow mooɗon haa lesdi njananndi ndi on meeɗaay anndugo, koo onon koo kaakiraaɓe mon. Ton on njagganto ɗowanteeɓe ɓe leɗɗe e kaa'e.
Naalooje ɗe'e fuu ngaran dow mooɗon. Ɗe tokkoto on, ɗe ukkanto on haa to on kalkidi ngam on nananaay Jawmiraawo, Allah mooɗon, on ɗowtanaaki umrooje maako e farillaaji maako ɗum o hokki on.
On njagganto konne'en mon ɓe Jawmiraawo nelata dow mooɗon. Weelo e ɗomka torran on, on cooyan limce e kuuje goɗɗe fuu. O yowan kaɓɓirgal njamndi dow daaɗe mon haa to on kalki.
Jawmiraawo umminan ummaatoore diga daayiiɗum, haa keerol duniyaaru, ummaatoore nde on anndataa wolde maare. O jippinan nde dow mooɗon bana dutal jipporto dow kusel.
Ɓe nyaaman dabbaaji mon e ƴaamle gese mon haa to on kalki. Ngam ɓe luttantaa on alkamaari e inaboojam e nebbam e ɓiɓɓe na'i e dammooji, haa to ɓe mbili on.
o nyaaman kusel ɓikkoy maako, o hokkataa ngel koo gooto maɓɓe, ngam walaa ko tammi luttango mo haa o jooɗi nder ɓillaare nde konne'en taarake berniiji mooɗon fuu.
Non boo debbo ne'iiɗo, jeynitiiɗo mo jaɓataa yahugo bee kosɗe ngam o diskuɗo masin, o laaran goriiko giɗaaɗo e ɓikkoy maako worɓe e rewɓe bee gite kalluɗe,
o nyaaman kusel ɓiŋngel maako ngel o danyi e baawol bee sirri, ngam walaa ko tammi luttango mo haa o jooɗi nder ɓillaare nde konne'en taarake on nder berniiji mooɗon fuu.
To on kakkilanaay umrooje tawreeta Allah, binndaaɗe nder deftere nde'e fuu, to on ɗowtanaaki ɗe, to on kulaay Jawmiraawo, Allah mooɗon marɗo innde teddunde e hulniinde,
To on ngi'i ko saaloto, ɓerɗe mon keewan kultoreeŋgol. To weeti, on keppanan kiikiiɗe. To hiiri boo, on keppanan fajiri daliila kulol ngol hebbinta ɓerɗe mon e kuuje ɗe ngi'oton.