|
| 1 |
|
| Moisesasti saskakïnwa: “Jichhasti yatxapxtawa kuna aski waxt'äwinaktix Diosar jaysapxatamat katuqapkäta, ukhamarak kuna ñanqhachäwinaktix Diosar jan jaysapxatamat katuqapkäta ukanaka. Tatit Diosamatix jumanakar mutuyasin markamat jayar jaqunukupxätam ukkhaxa, kuntix sapksma ukxat amuyt'asipxäta. |
|
| 2 |
|
| Jumanakampi wawanakamampitix amthapisisina, Tatitur wasitat jaysañatak makhatxapxäta, taqi chuymamampi, taqi jakañamampi, ukatsti iwxapksma uka kamachinakar phuqhapxarakïta ukapachasti, |
|
| 3 |
|
| Tatit Diosamax jumanakat khuyapt'ayasisin, wasitat jumanakar aski waxt'äwinak churxapxätam; wasitat tantachxapxätam jaqunukupktam uka markanakat irpthapisa, |
|
| 4 |
|
| kawkha jaya uraqinakansay jumanakan jaqunukut jaqinakamax jikxatasiskpan, uka chiqanakatpach Tatit Diosamax kuttayanxani, uka chiqakamaw jupanakar thaqhir sararakini. |
|
| 5 |
|
| Tatituw wasitat kuttayanipxätam, kawkïr uraqtix jumanakan awkinakamax katupkäna uka uraqiru; jumanakaw ukan utjasipxäta, juparakiw jumanakar jach'aptayapxätam, awkinakamat sipan walja wawanak churapxätam. |
|
| 6 |
|
| Tatituw jumanakan chuymanakamampiru, saraqirinakaman chuymapampir uka suma arust'äwin chimpup uchapxätam, juparu taqi chuymamampi, taqi jakañamampi munasiñamataki, ukhamat walja maranak jakapxañamataki. |
|
| 7 |
|
| Tatit Diosamaw taqi uka ñanqhachäwinak jumanakan uñisirinakamxar puriyani, khitinakatix uñisis arkanaqapktam ukanakxarus ñanqhachäwinak puriyarakini. |
|
| 8 |
|
| Jumanakasti Tatituruw kuttanxapxäta, juparuw ist'apxarakïta, ukhamarus kuntix jichhürun iwxapksma uka kamachi arunakarjamarakiw sarnaqapxäta. |
|
| 9 |
|
| Ukapachasti Tatitux taqi luräwinakaman jilarkir churapxätam, yuqall wawamasa, imill wawamasa waljaniw utjätam, uywanakamasa, yapu apthapitanakamas jilt'atäniwa; Tatit Diosamasti jumanakar aski lurasax wasitat kusisini, kamisatix nayra awkinakamar aski lurasax kusiskän ukhama, |
|
| 10 |
|
| jumanakatix Tatit Diosamar ist'apxäta, aka qillqatan kamachinakapar phuqhapxarakïta, ukatsti jupar taqi chuymamampi, taqi jakañamampi kunttanxapxarakïta ukapacha. |
|
| 11 |
|
| “Jichhürun churapksma uka kamachi arunakax janiw jumanakatak sinti ch'amäkiti, janirakiw jan phuqhañjamäkisa. |
|
| 12 |
|
| Janiw alaxpachankkiti, juman sañamataki: ‘¿Khitis jiwas lanti alaxpachar makhataspa, ukatsti apaqanisin jiwasar uñacht'ayistaspa ukat ukarjam sarnaqañasatakisti?’ sasa. |
|
| 13 |
|
| Janirakiw jach'a quta khurkatankkisa juman sañamataki: ‘¿Khitiraki jiwas lanti quta khurkatar makhataspa, ukatsti aptanisin jiwasar uñacht'ayistaspa ukat ukarjam sarnaqañasatakisti?’ sasa. |
|
| 14 |
|
| Ukat sipan, kamachi arunakax jumanakat wali jak'ankiwa, jumanakan lakamankiwa, amuyumankarakiwa, ukhamat phuqhapxañamataki. |
|
| 15 |
|
| “Uñjapxam, jichhüruw ajllisipxañamatak uñachayapxsma, mä tuqitxa jakañampi, suma sarnaqañampi; mä tuqitsti jiwañampi jan walt'añampi. |
|
| 16 |
|
| Jumanakatix jichhürun iwxapksma ukar jaysapxäta, Tatit Diosamarus munasipxäta, thakhipanjam arkapxäta, kamachi arunakapsa phuqhapxarakïta ukaxa, jakapxätawa, walja wawanakamaw utjapxarakïtam, Tatit Diosamasti aski waxt'äwinakap churapxätam, katuqapkäta uka uraqina. |
|
| 17 |
|
| Ukampis jan ist'asirïpkäta, yaqha diosanakar yupaychapxarakïta ukapachaxa, |
|
| 18 |
|
| nayax jichhüruw sapxsma, chiqpachan jiwapxäta, janirakiw walja maranakas Jordán jawir makhatasin katuntapkäta uka uraqin jakapkätati. |
|
| 19 |
|
| Alaxpachampi, akapachampiw qhanañchani; jichhürun nayan jumanakar jakañampita, jiwañampita ajllisiñamatak uñachayataxa; ukhamarak aski waxt'äwimpita, ñanqhachäwimpit ajllisipxañamataki. Ukhamax jakañay ajllisipxam, jumanakasa, wawanakamasa jakapxañamataki; |
|
| 20 |
|
| Tatit Diosamar munasipxam, jupar ist'apxam, suma iyawsañamp arkapxarakim, ukankiw jumanakan jakañamaxa, Tatitux Abrahamaru, Isaacaru, Jacob nayra awkinakamar churañ amtkatayna uka uraqin walja maranak jakañamasa.” |
|
|
|
|