Jehovah Kamuktaindeng’ung’, inendet ne landoi kondoenen; ak kobar bororiosiechu mi taing’ung’, ak inam ichek: landoi Josua kondoenen, ko u ye kimwa Jehovah.
Ak kiguur Musa Josua, ak kolenji, eng’ taitab Israelik tugul, Kimitu, nyiganitu: amu obendi koboto bichu oite emet ne kiiyosiechi Jehovah kwanisiekwok kole igochin; ak igochini ichek konyaban.
Ak king’at Musa bichoto kolenji, Kenyit age tugul ne igesunegei kenyitab tisab, eng’ betut ne kiging’at ne bo kenyit ne bo katiaget, eng’ igorta ne bo keriosiek,
Iyum bik, murenik, gotab kor ak lagok, ak toondeng’ung’ ne mi kurgotiguk, si kobiit kogas, ak konetgei, ak koiywei Jehovah Kamuktindeng’wong’, ak korib koyai ng’alek tugul che bo ng’atutioni;
si kogas lagokwak che tom konai ak konetgei koiywei Jehovah Kamuktaindeng’wong’, betusiek tugul kote osoptosi eng’ emet ne olandoe Jordan obendi oname.
Kilenji Jehovah Musa, Keero, kagorik betut ne imee: kuur Josua anyun, ak obe otononse emait ne kituiyechin, si ang’at inendet. Kiba anyun Musa ak Josua, kotononso eng’ emaitab tuiyet.
Ak kilenji Jehovah Musa, Keero, irue koboto kwanisieguk; yeityo kong’eetyo bichu koibotgei ak kanamonik che bo bororiosiek alak che bo emet, ole bendi kotebe kwenunywa, ak kobagakta, ak kobut kayomisennyu, ne kigiyomisge ak ichek.
Kolal anyun nereknatennyu eng’ betunoto agobo ichek, yeityo abagakte, ak auny togennyu, ak kiwong’ ichek, ak kobwanji yaitwogik ak nyalilwogik che chang’; ak kole eng’ betunoto, Tos mabwanjech yaitwogtichu amu mami Kamuktaindennyo kobotech?
Amu ye kaamut koit emet ne kiayosiechi kwanisiekwak, noto nyiitat chego ak kumik; ak ye kagoamis kobiyong’so, ak konerio; koweektagei anyun ole mi kanamonik koba koot, ak kosasa, ak kobut kayomisennyu.
Ak ye tun kagobwanji yaitwogik che chang’ ak nyalilwogik, kobaorian anyun tieni eng’ tainywa ko u baoriat; amu mautie iyotenywa eng’ kutuswekwak: amu agot nguno angen kabwatutikwak che ibwati, kotom amut koba emet ne kiayosiechi.
Oyumwa boisiek tugul che bo ortinwekwok, ak kiptainikwok, kobwa yu ami, si amwachi ng’alechu koba itikwak, aguur kipsengwet ak ng’ony kobaorian agobo ichek.