तब मोशाले यहोशूलाई बोलाएर इस्राएलका सबै मानिसहरूका सामुन्नेमा भने, “साहस गर अनि बलियो बन। परमप्रभुले तिनका पुर्खाहरूलाई प्रतिज्ञा गर्नुभएको देश कब्जा गर्न यी मानिसहरूलाई अगुवाइ गर्ने मानिस तिमी नै हौ।
सबै पुरुष, स्त्री, केटा-केटी र तिम्रा सहरहरूमा बास गर्ने विदेशीहरूलाई एकसाथ बोलाउनू अनि सबैले यो सुनेर परमप्रभु तिम्रा परमेश्वरलाई आदर गर्न र विश्वासयोग्यसाथ उहाँका शिक्षाहरू पालन गर्न सिकून्।
यसरी परमप्रभु तिमीहरूका परमेश्वरको नियमबारे कहिल्यै नसुन्ने तिम्रा सन्तानले पनि यसबारे सुन्नेछन्। अनि तिमीहरूले यर्दनपारि अधीन गर्न आँटेका देशमा बास गरून्जेल तिनीहरूले उहाँको वचन पालन गर्न सिक्नेछन्।”
तब परमप्रभुले मोशालाई भन्नुभयो, “अब तँ धेरै दिन बाँच्नेछैनस्। यहोशूलाई बोलाएर पवित्र पालमा लिएर आइज र म त्यसलाई आदेश दिनेछु।” मोशा र यहोशू पवित्र पालमा गए
परमप्रभुले मोशालाई भन्नुभयो, “तँ अब चाँडै मर्नेछस्। तँ मरेपछि मानिसहरू मप्रति अविश्वासी हुनेछन् र मैले तिनीहरूसित बाँधेको करार तोड्नेछन्। तिनीहरूले मलाई त्याग्नेछन् र तिनीहरू पस्न लागेका देशका देवदेवताहरूलाई पुज्नेछन्।
जब त्यसो हुनेछ, म तिनीहरूसित रिसाउनेछु, तिनीहरूलाई त्याग्नेछु र तिनीहरू नाश भएर जानेछन्, धेरै डरलाग्दा विपत्तिहरू तिनीहरूमाथि आउनेछन् र म तिनीहरूका परमेश्वर तिनीहरूका साथमा नभएकाले नै यी सबै कुराहरू हुँदै छन् भनी तिनीहरूले थाहा पाउनेछन्।
तिनीहरूका पुर्खालाई मैले प्रतिज्ञा गरेअनुसार म तिनीहरूलाई त्यस धनी र मलिलो देशमा लैजानेछु। त्यहाँ तिनीहरूले चाहेजति सबै खानेकुरा पाउनेछन् र सुख सुबिस्तामा बास गर्नेछन्। तर तिनीहरू फर्की गएर अन्य देव-देवता पुज्नेछन्। तिनीहरूले मलाई अस्वीकार गर्नेछन् र मेरो करार तोड्नेछन्
अनि धेरै डरलाग्दा विपत्तिहरू तिनीहरूमाथि आउनेछन्। तर यो गीत गाउनुपर्नेछ र तिनका विरुद्धमा यो गीत एउटा साक्षीको रूपमा रहनेछ। अहिले नै मैले दिन्छु भनी प्रतिज्ञा गरेको देशमा तिनीहरूलाई पुर्याउनुभन्दा अघि नै तिनीहरू के सोचिरहेका छन्, सो म जान्दछु।”
त्यसपछि परमप्रभुले नूनको छोरो यहोशूसित बोल्नुभयो र तिनलाई भन्नुभयो, “साहस गर् र बलियो बन्। इस्राएलीहरूलाई तैँले नै अगुवाइ गरी मैले प्रतिज्ञा गरेको देशमा पुर्याउनेछस् अनि म तँसित रहनेछु।”
तिम्रा कुल-कुलका अगुवा र अधिकृतहरू सबैलाई मेरो सामु भेला गर र म तिनीहरूलाई यी कुरा भन्न सकूँ। तिनीहरूका विरुद्धमा म स्वर्ग र पृथ्वी साक्षी राख्दछु।
म जान्दछु कि म मरेपछि मानिसहरू दुष्ट बन्नेछन् र मैले सिकाएका कुराहरू त्याग्नेछन् अनि भविष्यमा तिनीहरूमाथि विपत्तिहरू आइपर्नेछन् किनभने परमप्रभुले मनाही गर्नुभएका कुराहरू गरेर तिनीहरूले उहाँलाई क्रोधित पार्नेछन्।”