Cuɛ kɛ jiök i̱, “Ɛn täämɛ ci runkä a run ti kuɔr kɛl wi̱cdɛ jiɛɛn da̱ŋ rɛw. Thilɛ mi lɛnä luäŋ, kä ci Kuoth Nhial ɣä jiök i̱, ‘Ci bi wä kui̱ Yieer Jɔr-dɛn’.
Ɛn Kuoth Nhial Kuothdun puɔ̱nydɛ bɛ wä kui̱c nhiamdun. Bɛ dör ɛ tɔ̱ wä däk nhiamdun, kä bia wi̱i̱kiɛn cu ciɛŋ. Kä bi Jɔ-cua yɛ böth, ce̱tkɛ min ci Kuoth Nhial ɛ lat.
Ɛ jɛn cu Muthɛ Jɔ-cua cɔl, kä cuɛ jɛ jiök nhiam ji̱ I-thɛ-rɛl diaal i̱, “Bumni kä com rɔ. Kɛ ɣöö bi wä kɛ nɛy ti̱ti̱ muun in ci Kuoth Nhial ɛ la̱r gua̱ni i̱ bɛ ka̱mkɛ. Bikɛ jak kä ciaŋ kɛ jɛ.
Dol naath, wutni kɛ män, kɛ gaat, mäni juɔ̱r in te wi̱cdun, a kɛnɛ liŋ kɛ ɣöö ba Kuoth Nhial Kuothdun cu ŋa̱c, kä tit ɣöö bi rieet ŋuɔ̱tni ti diaal ɛ ti la̱t,
Kä cu Kuoth Nhial Muthɛ jiök i̱, “Nɛn ɛ, ji̱n ci thia̱k kɛ lia̱a̱. Kä nɛy ɛ ti, bikɛ rɔ lɔ̱ɔ̱ ka̱m pal kuth röli ti kɔ̱kiɛn, ti wäkɛ thi̱n ti. Bikɛn ɣä päl, kä ba gukdä min cä la̱t kɛ kɛ töl.
Ɛn cäŋ ɛmɔ bi kɛ̈cdä ben kä kɛ, kä bäkɛ päl ba rɔ cu na̱a̱n kɛ kɛ, kä bikɛ thuɔ̱k. Kä bi bɛ̈c bɛ̈ɛ̈c kɛnɛ jiäk ben kä kɛ, ɛn cäŋ ɛmɔ bikɛ wee, ‘Ci jiäk ɛ ti ku ben kä kɔn kɛ ɣöö /ci Kuothdan te rɛydan?’
Kɛ ɣöö mi wa̱a̱ kɛ wä naŋ muun caak kɛnɛ liɛɛth tuar, mëë ya̱cä gua̱ni, mi wäkɛ wä cuath kɛ mi̱thkɛ, bikɛ guɔ̱ɔ̱r ni kuth kɔ̱kiɛn, kä ba pal nikɛ, ba ɣä cu lo̱k kä töl kɛn gukdä.
Mi wä jiääk kɛnɛ bɛ̈c ben kä kɛ, bi dit ɛmɔ cua̱ neendiɛn mi thuɔ̱k (kɛ ɣöö /cɛ bi rueec kä karkiɛn). Kɛ ɣöö ŋa̱cä min go̱o̱r kɛn lätnidɛ, a /ka̱n kɛ ni nööŋ muun in cä ya̱ckɛ.”
Kä cu Kuoth Nhial ruac kɛ Jɔ-cua gat Nun jiökɛ jɛ i̱, “Bumni kä com rɔ. Kɛ ɣöö bi gaat I-thɛ-rɛl naŋ muun in cä yac i̱ bä ka̱m kɛ. Kä bä te kɛɛl kɛ ji̱.”
Kɛ ɣöö ŋa̱cä jɛ mi wa̱a̱ li̱w bia cu lät ɛ jiäk, kä bia duɔ̱ɔ̱p in cä la̱t yɛ cu päl. Kɛ gua̱a̱th mia̱a̱ bi ben ni, bi gua̱n jiäkni yɛ bath, kɛ ɣöö bia la̱t ni mi jiääk waaŋ Kuɔth Nhial, bia jɛ jak kä kɛ̈c kɛ lätkun.”