A o Del tumaro Gazda ka llal angla tumende ta ka zatril gole phuvien angla tumende trisardae sai tumen zivin ande lenge phuvia. O Josue ka llal angla tumende sar birovi gia sar phenda le o Del.
O Del ka cherel gale phuvienchar isto gia sar cherda ando Sijon ta ando Og, e charura katar e amorreura ta lenge phuvienchar kai l ka cherel gale phuvien te perenzatrisarda.
Mapalal o Moises ikharda e Josuee ta phenda leke angla sa o Israel: Te avel tut zor ta te ave tromano, soke tu ka de gale foroia kai e phuv kai o Del jala sovel tumare puranenge kai ka del la tumenge ta tu ka chere te sai len la peke.
Ta o Moises pisisarda gava zakono ta dia le kai e popura levita kai von sea kai inllarena e arka katar e alava e Devleke ta kai sa e phure katar o Israel.
Mapalal o Moises dia len gala alava so te cheren: Suako efta burs kana ka avel o burs katar o prostipe katar o unllilipe, kana cherdon e cherorra e patrenchar.
Saurre morabi te chidiniaon e murus e diskinie e minone ta e llene kai aven katar aver phuvia kai zivin ande tumare forura te sai asunen kana ka chitin o zakono ta te sikon te kanden ta te daran e Devletar tumaro gazda ta te thoven pe te kanden sa gala alava katar o zakono.
Gia lenge chaurre kai ni pinllarde gava zakono ka asunen le ta ka sikon te daran katar o Del tumaro Gazda sa e llivesa kai ka zivin ande phuv kai si pe ogoia rig katar o Jordan, kai llan te len e phuv.
Mapalal o Del phenda e Moiseseke: Avel pase o llive katar cho meripe, goleke ikhar e Josuee ta aduricharen man ande chara kai chidiniaon te sai phenav tumenge so te cheren O Moises ta o Josue llele kai e chara kai chidiniaon.
Ondaka o Del phenda e Moiseseke: Akana tu ka sove che puranenchar ta gava foro ka vazdiniaol ta ka kurvinpe e delenchar kai si avere phuvienge kote kai llan te aven po maskaral katar goia phuv ta ka muken man ta ka phagen e alava pe so achile lea.
Ta ka phabol mi joli pe lende ande gua llive ta ka mukav len ta ka guruvav lendar mo mui ta ka aven zatrime ta ka aven pe lende but bilachipe ta nuzde ta ka phenen ande gua llive: ¡Sa gava bilachipe avila pe amende soke ode Del inai maskar amende!
Soke me ka nakhavav len ande phuv kai jalem sovel tumare puranenge, phuv kai o thud ta o aullin llan sargo pai ta von ka jan lligo ni ka chalion ta ka thulion ta ka llan pala averenge dela ta ka blagosil len ta ka cheren man te joliaivav ta ka phagen me alava kai achilem lenchar.
A kana ka aven pe lende but zatranie ta nuzde gaia llili ka phenel lengi dos isto pe lengo mui soke lengo porodo ka delpe golli katar gaia llili ta ka llilaben la. Soke me llanav mai anglal so mangen te cheren mai anglal te nakhavav len ande phuv kai jalem lenge sovel kai ka dav len.
Ta o Del phenda e Josueke chaurro katar o Nun so te cherel gale alavenchar: Cerchuke zor ta te ave tromano, soke tu ka nakhave e foro katar o Israel ande phuv kai jalem lenge sovel kai ka dav len ta me ka avav tuia.
Soke me llanav kai tumen sen iek foro kai ni kanden ta kai sen zurale soreke ta i kana allive ziviu tumenchar tumen vazdiniaon po Del ¿A so ka avelpe kana me ka merav?
Soke me llanav kai kana ka merav tumen ka murin tumen ta ka durion katar o drom kai phendem tumenge te llan ta ando vreme mai angle ka avel pe tumende baro bilachipe, soke cherden o bilachipe angla e akha e Devleke ta ka cheren e Devle te joliaol tumenchar.