Parkara suku Yehuda dhabuna kantha reya: “GUSTE, peyarsa'agi serrona suku Yehuda; pakompollagi pole sareng bangsana. Tolonge e dhalem perrang, banto e dhalem ngadhebbi mosona.”
Parkara suku Lewi dhabuna kantha reya: “Kalaban Urim ban Tumim dhabuwagi karsaepon Junandalem, kalaban parantara'annepon oreng Lewi, abdiepon Junandalem se esto. Neng e Masa oreng Lewi sareng Junandalem eoji, neng e somber Meriba nyata esto kabbi.
Oreng Lewi ka Junandalem ce' estona, ngongkole kaestowanna ka oreng towana sareng ka la-balana. Papakonna Junandalem eestowagi, parjanjiyannepon Junandalem eteptebbi.
Moga tanana epabannya'a hasella se bagus, ban eberkadi bi' kabecce'anna PANGERAN se abu-dhabu dhari ombut se rabbang. Moga berkat jareya torona ka na' potona Yusup, sabab Yusup reya pamimpin e antarana tan-taretanna.
Yusup kowadda padha ban bantheng, ban tandhu'na sape alas lake'. Tandhu'na iya areya Manasye se abun-ebun ban Efraim se apolowan ebu. Sa-bangsa laen esodhuk esothok sampe' ka konco'na bume.”
Parkara suku Zebulon ban Isakhar dhabuna kantha reya: “Moga Zebulon ma'mora odhi'na lantaran parjalanan-parjalananna, ban Isakhar sennengnga e bengkona.
Se kadhuwa jareya ngonjang reng-oreng manca ka nong-gunongnga ban ngatorragi kurban se bendher e dhissa'. Se kadhuwa jareya sogi ollena dhari tase' ban dhari beddhi e salanjangnga paseser.”
Parkara suku Gad dhabuna kantha reya: “Molja'agi Allah se nambai baba kakobasa'anna Gad. Gad nyendhemme akantha macan se nyebbida lengngen otaba kole'na cethak.
Tana se paleng becce' ekala' dibi', bagiyanna pamimpin ebagi ka suku jareya. Hokom ban papakonna PANGERAN eestowagi kabbi e bakto pamimpin Isra'il teppa'na akompol e jadhiya”.
Parkara suku Naftali dhabuna kantha reya: “Naftali eparenge berkat ban kataresna'anna PANGERAN se ta' sakera-kera; baba kakobasa'anna molae dhari Talaga Galilea sampe' ka lao'.”
Allah salanjangnga se ajaga ba'na, lengngenna se langgeng daddi panyandharanna ba'na. Mosona ba'na eojuk kabbi, me' olle ta' lang-ngalange jalanna ba'na, ban ba'na epakon matompes mosona sampe' tadha' karena.
Isra'il, pojur onggu ba'na reya! Tadha' bangsa laen se etolonge PANGERAN akantha ba'na. PANGERAN dibi' se daddi peddhang ban tamengnga ba'na, se nolonge ba'na ban apareng kamennangan. So-mosona ba'na bakal dhatengnga nyo'on kabellasan, tape bi' ba'na padha eda'-didda'”.