परमप्रभु सीनै पर्वतबाट आउनुभयो, उहाँ सूर्य उदाएझैँ एदोममाथि उदाउनुभयो र पारान पहाडबाट आफ्ना प्रजामाथि चम्कनुभयो। दश हजार स्वर्गदूतहरू उहाँसित थिए, उहाँका दाहिने हातमा आगोको ज्वाला थियो।
परमप्रभुले आफ्ना प्रजालाई प्रेम गर्नुहुन्छ, अनि जो आफ्ना हुन्, तिनको रक्षा गर्नुहुन्छ। यसकारण हामी उहाँको चरणमा दण्डवत् गर्दछौं, र उहाँका आज्ञाहरू पालन गर्दछौं।
उनले यहूदा कुलबारे भने: “परमप्रभु! मद्दतको लागि तिनीहरूको पुकार सुन्नुहोस्, अरू कुलहरूसित तिनीहरूलाई फेरि एक पार्नुहोस्। परमप्रभु! तिनीहरूको निम्ति लडिदिनुहोस्, र तिनीहरूका शत्रुका विरुद्धमा मद्दत गर्नुहोस्।”
उनले लेवीका कुलबारे भने: “परमप्रभु! ऊरीम र तुम्मीमद्वारा आफ्नो इच्छा प्रकट गर्नुहोस्, आफ्नो विश्वासी सेवक लेवीहरूद्वारा त्यसो गर्नुहोस्। तपाईंले तिनीहरूलाई मस्साहमा जाँच्नुभयो, र मरीबाका पानीनिर तिनीहरू सच्चा छन् भनी प्रमाण गर्नुभयो।
हे परमप्रभु! तिनका कुललाई बलियो बन्न मद्दत गर्नुहोस्, तिनीहरूले जे गर्छन्, त्यसमा प्रसन्न हुनुहोस्। तिनका शत्रुहरूलाई चुर-चुर पारिदिनुहोस्, र तिनीहरू फेरि कहिल्यै उठ्न नसकून्।”
उनले बेन्यामीनको कुलबारे भने: “परमप्रभुले यही कुललाई प्रेम र रक्षा गर्नुहुन्छ, उहाँले तिनीहरूलाई रातभरि रखवाली गर्नुहुन्छ, र उहाँ तिनका माझमा बास गर्नुहुन्छ।”
बल्दै गरेको पोथ्राबाट बोल्नुहुने परमप्रभुको भलाइद्वारा आशिषित भएर तिनका देश सबै असल कुराहरूले भरिऊन्। यी आशिष् योसेफको कुलले पाओस् किनभने तिनी आफ्ना दाजुभाइका माझमा अगुवा थिए।
योसेफमा एउटा साँढेको बल र जङ्गली गोरुका सिङ छन्, मनश्शेका एक हजार र एफ्राइमका दश हजार पुरुषहरू नै तिनका सिङ हुन्। ती लिएर उनले जातिहरूलाई सिङले हान्नेछन्, र पृथ्वीका पल्लो छेउसम्म ठेली पठाउनेछन्।”
तिनीहरूले आफ्ना लागि सबैभन्दा असल जमिन लिए, तिनीहरूलाई एउटा अगुवाको हिस्सा ठहराइदिए। जब इस्राएलका अगुवाहरू एक ठाउँमा भेला भएका थिए, तिनीहरूले परमप्रभुका आज्ञा र नियमहरू पालन गरे।”
उनले आशेरको कुलबारे भने: “आशेरले अरू कुलहरूभन्दा धेरै आशिष् पाएको छ, त्यो आफ्ना दाजुभाइको भन्दा प्यारो होओस्। र त्यसका देशमा प्रशस्त जैतुनका रूख होऊन्।
हे इस्राएलका जन हो! तिमीहरूका परमेश्वरजस्ता अरू कुनै देवता छैनन्। उहाँ पराक्रमी शोभामा आकाशका बीचबाट भएर जानुहुन्छ, उहाँ बादलमा सवार भई तिम्रो मद्दत गर्नलाई आउनुहुन्छ।
परमेश्वरले सदा तिम्रो बचाउ गर्नुभएको छ, उहाँका अनन्त बाहुली तिम्रा सहारा हुन्। तिमीहरू अघि बढ्दा उहाँले तिम्रा शत्रुहरूलाई धपाउनुभयो, र ती सबैलाई नाश गर्नू भनी तिमीलाई भन्नुभयो।
हे इस्राएल! तँ कति खुसी छस्! तँजस्तो अरू कुनै जाति छैन, जुन जातिलाई परमप्रभुले बचाउनुभएको छ। परमप्रभु आफैं तेरो रक्षा गर्न र तँलाई विजय दिनको लागि तेरा ढाल र तरवार हुनुहुन्छ। तेरा शत्रुहरू दयाको लागि भिक्षा माग्दै आउनेछन् र तैँले तिनीहरूलाई कुल्चनेछस्।