Na ng'hana ū bebe ūbatogilwe a banhū bako; a beela a bose pye balī mu nkono gwako. A bose bakūtuja mazwi kū magūlū gako, banukūle būganikīlwa kūfuma kūlī bebe;
A ba ise nū nina akabahaya gīkī, ‘Ū nene natūbalonja a benabo.’ Nūūlū a baana ba ng'wawe atabadīlīlile, pyī nūūlū a baana bakwe atabasaatilwe. A miso gakwe gaalī galolelile ha mhayo gwako, walī alīlang'hanile ī lilagane lyako.
Ū Benjamini ūng'haya mu mihayo īyī; gīkī, “Ū nganja o ng'wa SEEBA n'alembeelage mu mhola yakwe; hū ng'wene akikalaga ankīngītīīlile na kūnang'hana līīmi ji, nū wikalo bokwe būlī ha mabega gakwe.”
Ū Yosefu ūng'haya mu mihayo īyī; gīkī, “Ū SEEBA ni ayīīlūkīlage ī sī yakwe, ayenhele wiza bo lūme lwa malunde ga kwigūlya, na wiza bo minzī ayo galī ga hasī, mu gatī ya sī;
Na a manong'ho gawiza ayo sī īkafunyaga nū wingī wago, nī shigongo shakwe ūyo walī ng'wisaka lyabakaga moto. Ī yose yenīyī īng'wikīīle ha ntwe gwakwe ū Yosefu, ha londooji lwakwe ūyo alī ntemi ha gatī ya bang'wawe.
Alī na shingilima gītī nzagamba mhyeeni; Ī mhembe jakwe jilī gītī ja shadiima nyang'widīīma. Hū jene akūjitūmamīla kūpama mahanga gose, kūshisha na a yayo galī kūle kū ngelelo ya sī. H'ūmo galī a makūmi ga shihūmbī ga ng'wa Efulaimu, alichene, h'ūmo galī a mashihūmbī ga ng'wa Manase.”
Bakwitana banhū ba mahanga bize kū lūgūlū, bize kūyegele shitambò sha būtūngīlīja; nguno bakūlya shitolyo sha mu nyanza, na bakwigūta shizeeze īsho shibisile mu maseni.”
Ū Gadi ūng'haya mu mihayo īyī; gīkī, “Alī na ūyo akūngalīhījaga Gadi wikalo, ī lipandī īlo Gadi akwikalaga gītī shimba ng'hīma. H'ūko akasaasagūlīlaga nkono, pyī nūūlū londooji lwa ha mitwe.
Ū Asheli ūng'haya mu mihayo īyī; gīkī, “Ū mu bitūnja bose ū Asheli afuuhilwe, ni bankūjage pye a baana ba ng'wawe; leka adabbye lūpambala lwakwe mu maguta.
Atīho ūngī wa kūlenganīla na Mulungu o ng'wa Yeshulumu, ūyo akikaga igashije ha malunde kwiza kūkūgunanha; alichene, higūlya ya malunde ng'wikūjo lyakwe.
Na lūūlū ū Isilaeli akwikala mu mhola we wike; nguno ū wikalo o ng'wa Yakobo būlang'hanilwe mu sī ya shilīwa shingī na divai, ūko malunde gakitaga lūme.
Ūlī na lubango Isilaeli! Nani ūngī wa kūlenganījiwa nang'ho, ū wa kūbiza gītī ihanga īlo lyapījiwa na SEEBA? Hū ng'wene alī lūmūda lwako na ngunanhi wako, nīyo hū ng'wene alī līlūshu lyako ly'ikūjo. A banishi bako bakūdetema ū kū būtongi wako, na a mapandī gabo ga higūlya ūkūgapandagīla.”