Musa nî aumîre kûu nthîgûrû ya Moabu areeta kîrîmeene kîa Nebo na araitia kathûmbi ka Pisiga, karîa keerekeene na nthîgûrû ya Jeriko. MWATHANI aramwonia nthîgûrû yonthe kuuma Gileadi mwanka Dani.
Aramwonia nthîgûrû yonthe ya Nafutali, na nthî ya Efuraimu na ya Manase, na nthîgûrû yonthe ya Juda mwanka rûteere rwa bwa rûgûrû rwa îria rîa Mediterania.
Nabo antû ba Israeli nî baarîrîîre Musa ntukû mîrongo îthatû barî kûu mûgwanthîîne jwa nthîgûrû ya Moabu. Rîu ntukû cia kîrîro na kwithikîîra nîûntû bwa Musa nî ciathirîre.
Joshua mûtaana wa Nuni nî oojûrîrwe nî roho wa ûûme, nîûntû Musa nî aarî akûmûthuura aa mûrîaûkua waawe. Nabo antû ba Israeli nî bamwathîkîîre na barathithia o ûrîa MWATHANI eerîte Musa.
Gûtî kîroria kîngî ta Musa kîomba kûringa biama na kûthithia magegania ta jarîa MWATHANI aatûmîte Musa eeta kûthithîria Farao, wa nthîgûrû ya Misri, amwe na nthûûmba ciaawe cionthe na nthîgûrû yaawe yonthe.