Siftor an boo a laatino maccuɗo nder lesdi Misra. E min Jawmiraawo, Allah maaɗa mi wurtini ma ton bee juŋngo am semmbiɗŋgo fortaaŋgo. Ngam man min Jawmiraawo, Allah maaɗa mi umri ma a siwto nyalaade siwtorde.
Teddin baaba ma e daada ma, bana min Jawmiraawo, Allah maaɗa mi umri ma. Nden kam a heɓan hayru, balɗe ma njuutan nder lesdi ndi min Jawmiraawo, Allah maaɗa ndokkanmaami.
Taa suuna debbo keeddiɗɗa. Taa suuna saare keeddiɗɗa, koo ngesa maako, koo maccuɗo maako, koo korɗo maako, koo nagge maako, koo wamnde maako e koo ɗume ko keeddiɗɗa mari fuu.
On mbi'i: Ndaa, Jawmiraawo, Allah meeɗen yi'ni min tedduŋgal muuɗum e maŋngu mum, min nani sawtu maako caka yiite. Min ngi'i hannde, neɗɗo yeeɗan koo to Allah wolwani ɗum.
Ammaa jonta, ngam ɗume yiite naawŋge nge'e wulata min haa min maaya, to min tokkitini nanugo sawtu Jawmiraawo, Allah meeɗen fahin, nden kam min maayan!
An Muusa, ɓadita, nan ko Jawmiraawo, Allah meeɗen wi'ete fuu. Nden lornan min ko Jawmiraawo, Allah meeɗen wolwani ma fuu, minin boo min nanante, min ɗowtanto ɗum.
Ammaa an, wondu bee am haa ɗo, haa mi wi'e umrooje e farillaaji e kiitaaji am fuu. Ekkitin ɗum yimɓe, haa ɓe ɗowtano ɗum nder lesdi ndi ndokkanmi ɓe ɓe mara.