“Hêng thupêk te, thuruat te leh awm dân tûr te hi Lalpa, in Pathian chuan zirtîr tûr che uin min ti a ni. Chu ram chu in luah hunah zâwm ṭhîn ang che u.
Chuvângin, aw Israel-te u, hria ula, ti ngei tûrin inpuahchah rawh u; in tân a ṭha ang a, khawizu leh hnutetuia luang ramah hian in pate hnêna Lalpa in Pathianin a tiam ang khân nasa takin in pung dâwn nia.
“In pu Abrahama te, Isaka te, Jakoba te hnêna pêk a tiam ram chu Lalpa in Pathianin a pe dâwn che u a; khawpui lian tak tak leh mawi tak tak, in din ni hauh lo chu in nei dâwn a ni.
Chuta in chhûngah chuan thil ṭha tak tak in dah ni lo a awm ang a; in laih hah loh tuichhunchhuah te a awm bawk ang a; grep huan leh Oliv hmun, in siam hah ni lo te in nei ang. Lalpan chu rama a hruai thlen hunah che u chuan ei tûr eng mah in tlachham lo vang.
In zînga chêng Lalpa in Pathian hi Pathian thîkthu chhe tak a ni, in chungah Lalpa in Pathian hi a thinur chuan khawvêl ata hi a tibo daih mai ang che u.
Lalpa chuan hêng thuruatte hi ti vek tûrin thu min pe a, kan ṭhatna tûrin Lalpa kan Pathian chu ṭih fo tûrin min ti a; tichuan, kan za-in vawiin thleng hian min la zuah ta zêl a nih hi.