“परमप्रभु तिम्रा परमेश्वरले तिमीहरूलाई सिकाउन भनी मलाई आज्ञा गर्नुभएका सबै नियमहरू यी नै हुन्। जुन देशमा पसी त्यसलाई आफ्नो अधीन गर्नेछौ, त्यहाँ तिनको पालन गर्नू।
तिमीहरूको प्राण रहुञ्जेलसम्म तिमीहरूले र तिम्रा सन्तानले परमप्रभु आफ्ना परमेश्वरको आदर गर्नू र मैले तिमीहरूलाई दिँदैगरेका नियमहरू पालना गर्नू। त्यसो भए तिमीहरू त्यस देशमा धेरै दिनसम्म जिउन सक्नेछौ।
हे इस्राएलका मानिसहरू हो! ती नियमहरू सुन र मान। तब सबै कुरामा तिमीहरूको भलो हुनेछ र तिमीहरू एउटा प्रतापी जाति बन्नेछौ। परमप्रभु हाम्रा पुर्खाका परमेश्वरले प्रतिज्ञा गर्नुभएअनुसार तिमीहरू त्यस असल र मलिलो देशमा बास गर्नेछौ।
घरहरू असल कुराहरूले भरिएका हुन्छन्, जुन तिमीहरूले राखेका होइनौ। त्यहाँ इनारहरू हुनेछन्, जो तिमीहरूले खनेका होइनौ अनि दाखबारी र जैतुनका बगैँचाहरू, जो तिमीहरूले रोपेका होइनौ। जब परमप्रभुले तिमीहरूलाई यस देशमा ल्याउनुहुन्छ, तब तिमीहरूको निम्ति प्रशस्त खानेकुरा हुनेछन्।
यदि तिमीहरूले अरू देवताहरूलाई पुज्यौ भने परमप्रभुको क्रोध आगोजस्तो तिमीहरूमाथि पर्नेछ किनभने तिमीहरूसँग बास गर्नुहुने तिम्रा परमप्रभु परमेश्वरले कुनै पनि विरोधीहरूलाई सहनुहुन्न।
जे कुरा ठीक र भलो भनी परमप्रभुले भन्नुहुन्छ, त्यही गर र सबै कुरामा तिमीहरूको भलो हुनेछ। परमप्रभुले तिमीहरूका पुर्खाहरूलाई प्रतिज्ञा गर्नुभएको मलिलो देश तिमीहरूले आफ्ना अधिकारमा लिनेछौ।
त्यसपछि परमप्रभु हाम्रा परमेश्वरले यी सबै नियमहरू पालन गर्नू र उहाँको डर मान्नू भनी आज्ञा हामीलाई दिनुभयो। हामीले त्यसो गर्यौं भने उहाँले सधैँ हाम्रो रखवाली गर्नुहुनेछ र हाम्रा जातिलाई सबै कुरामा उन्नति हुनेछ।