|
| 1 |
|
| Mbwenu ebi nibyo biragiro ebyatairweho n'ebyaragiirwe, ebi Mukama Ruhanga waanyu yandagiire kubeegyesa, ngu mubone kubikuratira muri omu nsi ei murikwambukamu kukubuura; |
|
| 2 |
|
| ngu obone kutiina Mukama Ruhanga waawe, iwe na mutabani waawe, na mwijukuru waawe, nimukuratira ebye byona ebyatairweho, n'ebiragiro bye ebi ndikubaragiira kukuratira, omu biro byona eby'amagara gaanyu, mubone kumereera. |
|
| 3 |
|
| Mbwenu iwe Isiraeli, hurira, kandi oteho omutima kubikora, obone kuba gye, n'okukanya munonga omuri egyo nsi erikuhimintika amate n'obwoki, nk'oku Mukama Ruhanga wa baashwenkuru yaakuraganiise. |
|
| 4 |
|
| Iwe Isiraeli, hurira: Mukama Ruhanga waitu aba omwe. |
|
| 5 |
|
| Mbwenu guma okunde Mukama Ruhanga waawe n'omutima gwawe gwona, n'amagara gaawe goona, n'amaani gaawe goona. |
|
| 6 |
|
| Ebi ndikukuragiira eri izooba bikugume aha mutima. |
|
| 7 |
|
| Oyezirikye kubyegyesa abaana baawe, obigaaniire oshutami omu nju yaawe, nari noogyenda omu muhanda nari obyami nari waimuka. |
|
| 8 |
|
| Ogume obikome aha mukono gwawe bibe akamanyiso; obijware aha buso bibe ekisingo. |
|
| 9 |
|
| Obihandiikye aha nti z'emiryango y'enju yaawe n'aha marembo gaawe. |
|
| 10 |
|
| Haza Mukama Ruhanga waawe ku arikuhitsya omu nsi ei yaarahiire baashwenkuru, Aburahamu, Isaaka na Yakobo, kugikuha, n'endembo zaayo empango kandi enungi, ezi otarombekire, |
|
| 11 |
|
| n'amaju gaijwire ebintu byona ebirungi ebi otaratairemu, n'amaziba gafukwirwe agu otarafukwire, n'emisiri y'emizaabibu n'emiti y'emioliva ei otarabyaire, reero ku orirya waiguta, |
|
| 12 |
|
| oyerinde otakaayebwa Mukama owaakwihire omu nsi ya Misiri ei waabaire ori omuhuuku. |
|
| 13 |
|
| Guma otiine Mukama Ruhanga waawe, omuheereze, n'eiziina rye obe niryo waaguma noorahira. |
|
| 14 |
|
| Mutariramya baaruhanga abandi ab'amahanga agabeehinguririize; |
|
| 15 |
|
| ahabw'okuba Mukama Ruhanga waawe otuura ahagati yaawe, aba Ruhanga w'eihato; ekiniga kya Mukama Ruhanga waawe kitakaakubugumaho, akakucwekyereza, akakumara omu nsi. |
|
| 16 |
|
| Mutarigyeza Mukama Ruhanga waanyu, nk'oku mwamugyereize Maasa. |
|
| 17 |
|
| Mugume mwezirikye kworobera ebiragiro bya Mukama Ruhanga waanyu, n'ebi yaahamize, n'ebi yaataireho, ebi yaabaragiire. |
|
| 18 |
|
| Ogume okore eby'oburyo kandi ebirungi omu maisho ga Nyakubaho, obone kuba gye, oze omu nsi nungi ei yaarahiire kuha baashwenkuru, haza ogikubuure, |
|
| 19 |
|
| noobingamu abazigu baawe boona abakuri omu maisho, nk'oku Nyakubaho yaaraganiise. |
|
| 20 |
|
| Mutabani waawe ku arikubuuza omu biro ebiriija, ati: Eby'obuhamya n'ebyatairweho n'ebyaragiirwe, ebi Mukama Ruhanga waitu yaabaragiire, nibimanyisa ki? |
|
| 21 |
|
| Obwo omugarukyemu oti: Tukaba turi abahuuku ba Faraaho omuri Misiri; Nyakubaho yaatwihisayo omukono gwe gw'amaani. |
|
| 22 |
|
| Nyakubaho ogwo akooreka obumanyiso n'eby'okutangaaza bikuru kandi ebirikutiinisa, naabikora ahari Misiri na Faraaho n'ab'eka ye boona nitubireeba. |
|
| 23 |
|
| Reero itwe yaatwihayo, ngu abone kutureeta n'okutuha ensi ei yaarahiire kuha baatatenkuriitwe. |
|
| 24 |
|
| Nyakubaho nikwo kuturagiira kuguma nitukuratira ebyatairweho ebyo byona, kutiina Mukama Ruhanga waitu, ngu tubone kuba gye ebiro byona, ngu nawe abone kuturinda, tukaguma tuhuriire, nk'oku kiri eri izooba. |
|
| 25 |
|
| Kandi ku turitaho omutima twahitsya ebiragiro ebyo byona omu maisho ga Mukama Ruhanga waitu, nk'oku yaaturagiire, kiryatuhaisa okuhikiirira. |
|
|
|
|