|
| 1 |
|
| «Martine ragidhinanni baattora agadhitinanni gede rosiisammo'nera Magani'ne Kaaliiqi uyinoe hajajo, woganna seeru kunninni aane nooho: |
|
| 2 |
|
| Kunino, eemmo'neta woganna hajajo baalanta agadhatenni, diri'ne seedanno gede, ki'ne, ooso'nenna ooso'ne ooso lubbotenni heedhinoonni diri baalunkunni Magano'ne Kaaliiqa ayirrissinanni gedeeti. |
|
| 3 |
|
| Kunnira Israeele, macciishshe! Annuwa'ne Magani Kaaliiqi uyino'ne hexxo garinni, malawunna ado lolakkannotera danchanna shaqqado baattora seyanno'ne gedenna lowo geeshsha batidhinanni gede, hajajosi seekkitine agadhe. |
|
| 4 |
|
| «Israeele, macciishshe! Magani'ne Kaaliiqi mitto Kaaliiqaati. |
|
| 5 |
|
| Magano'ne Kaaliiqa, wo'mu wodani'nenni, wo'ma lubbo'nenni, wo'ma wolqa'nenni baxxe. |
|
| 6 |
|
| Techo eemmo'neta tenne hajajo wodani'nera wodhe. |
|
| 7 |
|
| Ooso'nerano rosiissensa. Mine'ne ofoltinanni woyite, doogo hadhinanni woyiteno, goxxinanninna ka'inanni woyite hajajo'yare kula agurtinoonte. |
|
| 8 |
|
| Qaagginanni gede tenne hajajo borreessitine anga'nera usudhe; albi'ne aanano wodhe. |
|
| 9 |
|
| Mini'ne tanqiranna katami'ne waalchira borreessidhe. |
|
| 10 |
|
| «Magani'ne Kaaliiqi ki'nera aara annuwa'ne Abirihaamira, Yisihaaqiranna Yaiqoobira xaarinonsa baatto haa're massanno'ne woyite, hakkiicho ki'ne mi'nitinoonnikkire jajjabbanna biifadda katamma, |
|
| 11 |
|
| umi'neta ikkitinokkita danchu coyi baalu wo'mino minna, u'mitinoonnikkita wayi balla, kaasidhinoonnikkiha woyinete kaashshonna ejersu haqqe eenna'ne ittine duubbinanni woyite, |
|
| 12 |
|
| borojjimmatenni Gibitsete gobbanni fushshino'neha Kaaliiqa habbinannikki gede qorophe. |
|
| 13 |
|
| «Magano'ne Kaaliiqa ayirrisse; isi callaho soqqamme. Isi su'mi callunni xaarre. |
|
| 14 |
|
| Gaangaawi'nera noo manni magansi'rannota wole maganna ha'runsitinoonte. |
|
| 15 |
|
| Mereero'ne noohu Magani'ne Kaaliiqi wole maganna magansi'nanna lae cincannokki daafira, hanqisi aana'ne giirate gede buweenna baattote aaninni hunanno'ne. |
|
| 16 |
|
| «Maasahi yinanni darga assitininte gede Magano'ne Kaaliiqa jiffinoontesi. |
|
| 17 |
|
| Magani'ne Kaaliiqi uyino'ne hajajo, biddishshanna woga seekkitine agadhe. |
|
| 18 |
|
| Seyanno'ne gedenna Kaaliiqi annuwa'nera xaare uyinonsa hexxonni shaqqado gobba martine ragidhinanni gede, Kaaliiqi albaanni suwashshonna dancha coye asse. |
|
| 19 |
|
| Kaaliiqi uyino'ne hexxo garinni diinna'ne baalanta albi'nenni shorritinanni. |
|
| 20 |
|
| «Kunni gedensaanni ooso'ne, ‹Maganinke Kaaliiqi konne biddishsha, woganna seera mayira uyinonke?› yite xa'mitanno'ne yannara, |
|
| 21 |
|
| ki'neno, ‹Ninke Gibitsete gobbara Ferioonira borojje ikkine hee'noommo. Kaaliiqi kayinni jawaata angasinni hakkiinni fushshinonke. |
|
| 22 |
|
| Ninke illenkenni la'nanna Kaaliiqi jajjabbanna waajjishshanno dhagge Gibitsete Feriooninna minisi manni baalu aana leellishino. |
|
| 23 |
|
| Ninke kayinni, annuwankera xaare uyino hexxo garinni haa're masse baatto aankera hakkiichchinni fushshinonke. |
|
| 24 |
|
| Techonte gede aye yannarano seyannonke gedenna lubbotenni hee'neemmo gede, tenne woga baalanta wonshinammoranna ayirrinsammosira Maganinke Kaaliiqi hajajinonke. |
|
| 25 |
|
| Xa tenne baalanta hajajo Maganinke Kaaliiqi hajajinonke garinni isi yiinore seekkine agadhinummoro, ninkera keeraanchimmate kiirantannonke› yitine kultinanninsa. |
|
|
|
|