Mubize na logohano ū kūlī SEEBA Mulungu wing'we; a bing'we benekīlī na a bana bing'we, hamò na a baana babo a hanuma yabo. Pyī ī shikū ja būpanga wing'we mushimīzīle ū mu kahelele na a malange gakwe; nī shilagīlo īsho nalīng'winha, ī shikū ja būlamu wing'we jongejiwe.
Īkwigelelilwe ūbalange a baana bako mu welwa ng'holò; ūlū ng'wigashaga mu kaya ng'ūshihooyela, nūūlū mukūyeelaga mu nzīla, nūūlū ūlaalile; nūūlū ng'wikanza lya kūbūūka.
na numba jokalile shikolo shawiza īsho ūtashitūūlile mo bebe, na nzwinzī ja minzī ījo ūtajisīmbile bebe, na migūnda ya mizabibu na ya mizeituni nayo ūtīlīmile bebe; ūkūlya kūshisha wigūte.
Beejaga ya būtūngīlīja na yawiza ū kū būtongi bo ng'wa SEEBA, ī mihayo yako īkūbeelele, hū ūkūdūla ū kwīsola ī sī yawiza yenīyo, īyo SEEBA akabisagīja mu kūbilahīlīla bakūlūgenji bako;
Ūlū ūkūbūūja ng'witūnja wako ū kū shikū ja kū būtongi, “A kahelele ako SEEBA Mulungu wise wamulagīla, nū būkaanīji wakwe pyī nī shilagīlo, shilī na makūlū kī?”
Nīyo ū SEEBA akoolecha būlolelo na mihayo ya kūkumya no, hangī mitaale na ya kūkamaaja; yūbagwīla a bana Misili, nū Falao hamò nī kaya yakwe ī yose, tūlolile na miso gise gīkī.