|
| 1 |
|
| Moisesasti saskakïnwa: “Tatit Diosasaw churapkätam uka uraqir puriyapxätam, ukatsti jumanakat sipan paqallqu wali jach'a ch'amani markanakaruw jaqunukuni: hititanakaru, gergeseonakaru, amorreonakaru, cananeonakaru, ferezeonakaru, heveonakaru, jebuseonakaru. |
|
| 2 |
|
| Kunapachatix Tatit Diosamax uka markanak jumanakar katuyapkätam, ukatsti jupanakar atipjapxarakïta ukkhasti, janiw jumanakax jupanakat khuyapayasipxätati, janirakiw kuna suma arust'äwirus jupanakampi mantapxätati; q'alpun uka markanak t'unjapxäta. |
|
| 3 |
|
| Janiw jumanakax jupanakamp mä wila masir tukupxätati, janirakiw yuqall wawamarusa, imill wawamarus uka jaqinakan wawanakapamp jaqichasiñap munapxätati. |
|
| 4 |
|
| Ukham lurapxasma ukkhasti, jupanakax wawanakamarux Tatitut armasiyapxaspa, yaqha diosanakaruw yupaychayapxarakispa. Ukatsti Tatitux jumanakatakiw q'apisispa, ukatsti jank'akiw t'unjapxiristam. |
|
| 5 |
|
| Ukat sipana, jupanakarux akanak lurapxäta: Altaranakap tinkuyapxäta, yupaychañ qalanakapampi, lawanakapamp t'unjapxarakïta, idolonakapsa taqpach phichhantapxäta. |
|
| 6 |
|
| Jumanakasti Tatit Diosamatak ajllit markäpxtawa; Tatituw jumanakarux aka uraqin utjir taqi markanak taypit ajllisipxtam, ukhamat jumanakan jupatak yaqhachat markäpxañamataki. |
|
| 7 |
|
| “Tatitusti janiw jumanakarux yaqha markanakat sipan jach'a markäpxatam laykuti ajllisipktamxa, jan ukasti jumanakax taqi markanakat sipan jisk'a markakïpxtawa. |
|
| 8 |
|
| Tatituw Egipto markan t'aqhisiyat jakañat irpsunipxtam, ukatsti jach'a ch'amapampiw faraón reyin apnaqäwipat qhispiyanipxtam, jumanakar taqi chuymapampi munatapata, awkinakamar arupampi arsuwaykatayna uka arunak phuqhañ munasa. |
|
| 9 |
|
| Yatipxam, Tatit Diosax chiqa Diosawa, jupakirakiw arust'äwipsa munasiñampi wawanakapana, wawanakapamp phuqharaki, jupar taqi chuymampi munasirinakaru, kamachi arunakapsa phuqhirinakaru. |
|
| 10 |
|
| Ukampis jupar uñisirinakarux jank'akiw t'unjaraki. |
|
| 11 |
|
| Ukhamasti, kamachi arunakampiru, arsüwinakampir phuqhapxam, kunjämtix jichhürun churapksma ukhamarjama. |
|
| 12 |
|
| “Jumanakatix uka arsutanak ist'asin phuqhapxäta, uka kamachinakarjam sarnaqapxarakïta ukkhaxa, Tatit Diosax munasiñampiw phuqhani nayra awkinakamamp lurat suma arust'äwipampi, arsutapampi. |
|
| 13 |
|
| Jumanakarusti munasiñampiw uñjapxätam, aski waxt'äwi churapxätam, mirantayapxarakïtamwa; wawanakamar aski waxt'äwinak churani, yapunakamaru, taqi achunakamaru, trigo yapunakamaru, vinomaru, aceitemaru, ukhamarak vacanakamana, ovejanakaman qallunakapar aski waxt'äwinak churani, nayra awkinakamar juramentomp churañ arsuwaykän uka uraqina. |
|
| 14 |
|
| Jumanakasti taqi markanakat sipan walja aski waxt'äwinak katuqapxäta; janiw jumanak taypin jan wawachasir warmisa, jan wawani jaqisa utjkaniti; uywanakam taypinsa janiw jan mirir uywax utjkaniti, qachu uywatsa, urqu uywatsa. |
|
| 15 |
|
| Tatitusti taqi usunaka, mutuñanaka jumanakat apaqapxätam, Egipto markar apaykän uka usunak apanukuni; ukampis Tatitux taqi uka usunakampiw uñisirinakamar t'aqhisiyani. |
|
| 16 |
|
| Jumanakasti kawkïri markanaktix Tatit Diosamax amparanakamar katuyapkätam uka markanakarux t'unjapxätawa; jan jumanakax jupanakat khuyapayasipxamti, diosanakaparus jan yupaychapxamti, ukham lurapxätaxa, aynacht'añaruw puripxasma. |
|
| 17 |
|
| “Inas jumanakax chuymanakaman amuyapxchïta: ‘Aka markanakax jiwasat sipan juk'ampi jilt'atawa, ¿kunjämaraki t'unjapxiriststi?’ sasa. |
|
| 18 |
|
| ¡Ukampis jumanakax jan axsarapxamti! Sum amtasipxam kunjämtix Tatit Diosamax faraón reyimpiru, egipcionakampir lurkän ukanaka. |
|
| 19 |
|
| Amuyt'asipxarakim, nayranakamamp uñjapkta uka jach'a uñacht'äwinakata, uka jach'a muspharkañ luräwinakatsa, kunja jach'a ch'amampis Tatit Diosamax Egipto markat irpsunipxtam ukanakata. Uka pachparak Tatit Diosamax lurani, axsarapkta taqi uka markanakaruxa. |
|
| 20 |
|
| Ukhamarusa, Tatitux jupanak taypir wali axsarkañanak apayanini, jiwañat qhispirinakampiru, imantasirinakampir jiwarayañataki. |
|
| 21 |
|
| Ukhamasti jumanakax jan jupanak nayräxan khathatipxamti, jumanakan Tatit Diosama, jach'a axsarkañ Tatituw jumanakampïski. |
|
| 22 |
|
| Tatitux juk'at juk'at uka markanakar jaqunukuskani; jumanakasti janiw jupanakar jank'aki tukjapkasmati, qullun jakir qhuru animalanakaw mirantaspa, ukatsti muyuntasin chhukxatapxiristam. |
|
| 23 |
|
| Ukampis Tatit Diosamaw uka markanak jumanakar katuyapxätam, juk'at juk'at jupanakar q'al tukjañkama. |
|
| 24 |
|
| Reyinakaparus jumanakaruw katuyapxätam, ukatsti jumanakaw jupanakarux chhaqtayapxäta aka uraqin khitis jupanakat jan amtaskiri. Janiw jupanakat khitis jumanak nayräxan sayt'asirjamäkaniti, jumanakaw taqi jupanakarux jiwarayapxäta. |
|
| 25 |
|
| Uka markanakar atipjasasti, diosanakapsa ninampiw phichhantapxäta, ukampis janiw uka diosanakapar lip'suyat quripsa qullqipsa katusiñ yant'apxätati; jumanakax jan ukamp yant'ayasipxamti, uk lurasasti Tatit nayraqatan jan wali lurapxasma. |
|
| 26 |
|
| Ukhamasti, jumanakax utanakamar kunatix ñanqhachatäki ukanak jan apasipxamti, taqi ukanakax ñanqhachatawa, uk lurapxäta ukasti, jumanakas t'unjataw uñjasipxarakïta. |
|
|
|
|