“Ka Ruoth Nyasaye ma Nyasachu oterou mondo ukaw piny ma ubiro dhiyoeno, noriembnu ogendini abiriyo madongo kendo marateke moloyou, ma gin jo-Hiti, gi jo-Girgash gi jo-Amor gi jo-Kanaan gi jo-Perizi gi jo-Hivi kod jo-Jebus.
nimar kutimo kamano, to nyigo nolok chuny yawuotu mondo kik lam Ruoth Nyasaye, to olam mana nyiseche mamoko. Mano dimi Ruoth Nyasaye kech kodu, kendo tieku piyopiyo.
Noyierou mana nikech noherou, kendo nikech norito singruok mane otimo ni kwereu. Mano emomiyo nogolou gi tekone maduong’ e piny mane unie wasumbini, moresou e lwet Farao ruodh Misri.
Omiyo koro ng’euru ni Ruoth Nyasaye ma Nyasachu en Nyasaye. En Nyasaye ma jaadiera kendo marito singruokne kuom tienge gana gi gana mag ji mohere kendo momako chikene, koherogi gi hera mosiko.
Enoheru kendo enogwedhu, mi enomi unya mathoth. Enoguedhu gi nyithindo mang’eny kod gik manyak e pwotheu, kaka ngano gi divai kod mo, kendo enoguedhu gi jamni mang’eny e piny ma nosingore ni kwereu ni nomiu.
Tiekuru ji duto ma Ruoth Nyasaye ma Nyasachu biro chiwo e lwetu. Kik uwegi, to bende kik ulam nyisechegi, nikech kutimo kamano, to mano dibednu obadho.
Paruru timbe madongo mane uneno gi wang’u kod ranyisi gi honni kaachiel gi teko maduong’ mane Ruoth Nyasaye ma Nyasachu ogolougo Misri gi bat morie. Kamano e kaka obiro timo ni ogendini duto muluorogo.
Kik ukel gimoro amora makuero e miechu, nikech kutimo kamano, to un bende unubed joma okwedi. Nyaka ubed mosin kod gik ma kamago, kendo ukwan-gi ka gik makuero, nikech gin gik ma nyaka utiek, marum chuth.