“Kom-hokom se eajarragi sengko' are teya kodu estowagi kabbi sopaja ba'na teptebba odhi', atamba bannya' ban bisa'a ngennengnge nagara se ejanjiyagi PANGERAN ka bangatowana ba'na.
Kaenga'e, pa' polo taon abidda ba'na epimpin GUSTE Allahna e dhalem parjalanan se jau lebat e ra-ara. Parjalanan jareya bi' Pangeran emaksottagi nyoba'a ba'na, sopaja Pangeran ngagaliya ka essena atena ba'na, ban pole sopaja etemmo keya apa ba'na ngestowagi papakonna apa enja'.
GUSTE Allah abakta ba'na ka nagara se landhu, se bannya' songayya ban bannya' somberra, se e dhalem tanana agili aeng se nancel ka ra-cora ban ka mo'-gumo'.
Pangeran mimpin ba'na lebat e ra-ara se lebar tor nako'e, se bannya' olarra ban kalajengkingnga. E tana se kerreng se tadha' aengnga rowa Pangeran magili aeng dhari dhalem bato sopaja ba'na bisa'a ngenom satobugga.
E ra-ara ba'na eparenge manna se daddi kakanna, bangatowana ba'na dibi' ta' tao rassana ngakan kakanan jareya. Ba'na epakantha jareya polana Pangeran ngojiya ba'na, sopaja dhi-budhina Pangeran bisa'a apareng kabecce'an ka ba'na.